«Нефтехимик» уенчылары Чистайның яшь хоккейчылары белән тәҗрибә уртаклаштылар

Боз сараенда  яшь хоккейчыларның  Түбән Кама шәһәреннән килгән «Неф­техимик» хоккей командасы белән очрашуы булды. Үз эченә  пресс-конференцияне, автограф-сессияне һәм боз күнекмәләрен  алган  әлеге чара  Чистай хоккейчылары өчен  матур традициягә әверелде.

Бозга чыгар алдыннан  кунак­лар   яшь буын белән  түгәрәк өстәл артында  аралаштылар. Әңгәмәдә  Иван Николишин, Илья Пастухов, Данила Квартальнов, Матвей Заседа һәм Ярослав Озолин катнашты.

Чистай районы башкарма комитеты җитәкчесе  Эдуард Хәсәнов катнашучыларны кайнар сәламләде:

–Чистайга  безнең дуслар килде, бу бик күркәм традиция,  – диде ул. Аннары яшь хоккейчыларга мөрәҗәгать итте:

–Егетләр, үзегезгә ышаныгыз. Мин балачакта үзем дә хоккейчы булырга хыялландым. Хыяллану оят түгел, хыялсыз яшәргә ярамый. Бөтен кешенең килеп тә чыкмаска мөмкин. Әмма омтылырга кирәк.

Яшь спортчылар  хөрмәтле кунаклардан  карьераларының башлануы, яраткан спорт төрләре (хоккейдан тыш)  һәм команда эчендәге мохит турында  сораштылар. Әңгәмә тере һәм табигый килеп чыкты.

–Сез ничек хоккейга килдегез? – дип кызыксынды «Кара пантералар» командасында тәрбияләнүче Павел  професионаллардан.

– Хоккейга мине әтием дүрт яшемдә чакта урамда тик  йөрмәсен, спорт белән шөгыльләнсен дип алып килде. Мин капкага 11 яшемдә бастым. Үземне сынап карадым – ошап китте, шулай итеп мин капкачы булдым, – диде  Яро­слав Озолин.

Иван Николишин  да үзенең тарихы белән уртаклашты:

–Минем әтием һәм абыем – профессионал хоккейчылар, шуңа күрә минем алда «хоккей белән шөгыльләнергә телим яисә теләмим» дигән сорау тормады. Тимераякка мин биш яшемдә бас­тым. Хоккейдан тыш без футбол һәм теннис та уйнадык.  Шуңа күрә, әйдәгез, алга омтылыгыз!  Сезнең яшьтә  спортның берничә төре белән шөгыльләнергә мөмкин. Билгеле инде, уку турында да онытырга ярамый – белемле булу бик мөһим.

 «Нефтехимик» хоккейчылары  сорауларга җавап кына биреп калмадылар, нәни спортчыларга да сораулар юлладылар. Балалар үзләрен ышанычлы итеп тоттылар.

Теоретик өлешнең кульминацион ноктасы булып  автограф-сессия торды. Балалар кумирларыннан уен свитерларына, футболкаларына, бейсболкаларга имза куюларын  сорадылар. Яшь спортчылар эмоцияләрен  яшереп тора алмадылар  һәм васыять имзаларына нык сөенделәр.

–Мин яраткан хоккейчыларымнан  автограф алуыма шат! – дип сөйләде  биш яшьлек Абдерахман Камалов.

Аннары катнашучылар өчен бозда мастер-класс үткәрелде. Балалар берничә төркемгә бүленеп, капкага туп ату, шайба һәм кәшәкә белән идарә итү күнекмәләрен кабатладылар, бозда шууда үзләрен  сынадылар. Һөнәри уенчылар  җитәкчелегендә  яшь хоккейчылар  яңа күнегүләр  һәм  осталыкның кыйммәтле  серләрен үзләштерделәр.

– Балалар барысын да тиз отып алалар, – дип аңлатма бирде  сакта торучы  Илья Пас­тухов. – Бүгеннән соң  алар  нык үҗәтлек белән күнегүләргә йөриячәкләр.