Чистайда «Карлы узышлар» булды

Узган ялларда Скарятин бакчасында «Карлы узышлар» дигән спорт чарасы узды. Аны «Выбор» яшьләр-яшүсмерләр клубы оештырды, ә вакыйга үзе «Татарстанда кыш» төбәк проекты кысаларында узды, дип хәбәр итә «Чистай яшьләре».

Узышта җирле бюджет учреждениеләрендә эшләүче 15 гаилә катнашты. Аларга парк кунаклары – саф һава суларга чыккан чистайлылар да актив кушылдылар.

Катнашучыларга сәламләү сүзе белән Чистай муниципаль районының эшләүче яшьләр берлеге кураторы, «Выбор» яшьләр (яшүсмерләр) клубы мөдире Анфиса Захарова, дәүләт учреждениеләре һәм җәмәгать хезмәте күрсәтү хезмәткәрләренең Чистай территориаль оешмасы җитәкчесе Людмила Вәлиуллина мөрәҗәгать иттеләр.

Бәйрәмнең аерым атмосферасын яшүсмерләр клубы активистлары – КИУның Чистай филиалы студентлары тудырды. Әкият геройлары костюмнарын киеп, алар катнашучыларны озата йөрделәр, аларга трассада булыштылар һәм барысына да яхшы кәеф бүләк иттеләр.

«Карлы узышлар» нәтиҗәләре:

1 урын – Горячевлар гаиләсе.

2 урын – Нуретдиновлар гаиләсе.

3 урынны Сидоровлар гаиләсе һәм «Еноты» командасы (5нче мәктәпнең 7 «Г» сыйныфы укучылары) бүлеште.

Чара барлык катнашучыларга һәм тамашачыларга күтәренке кәеф бүләк итте!