Айрат Хәйруллин: «Быел икмәк уңды!»

- Бәхеткә, урып-җыю эшләре тәмамланды, - дип, зур канәгатьлек белән сүзен башлады Айрат Нәҗипович. - Быел Әлки районы республикада җыеп алынган азык-төлек бодаеның якынча 12-13%ын әзерләр, дип уйлыйм. Һәм бу әле Татарстандагы 43 районның берсе генә. Тирә-юньдәге районнар - Спасс, Алексеевск, Нурлат - шулай ук тырышып эшлиләр һәм уҗым бодаен игү технологияләре анда да яхшы үтәлә. Шулай да бодай буенча Әлки районы республикада - беренче, моны республиканың ашлык кабул итү пунктлары һәм элеваторлары мәгълүматлары раслый.

Әлки районы басуларында үскән бодайларның барысы да диярлек азык-төлек статусына ия. Уртача уңыш - гектарыннан 38 центнер, аерым участокларда 50гә дә җитә. Ә кырларда калган саламны махсус урып-җыю машиналары, берүк вакытта түкләр ясап, җыя бара һәм райондагы терлекчелек комплексларына һәм фермаларга озата.

- Быелгы ел бик уңышлы килде, - дип, басым ясый Айрат Хәйруллин. - Уҗым бодае, кукуруз, көнбагыш игү белән шөгыльләнүче бөтен хуҗалыклар өчен дә ел бик табышлы булырга охшаган. Барлык технологияләрне саклап, үсемлекләр үстерүнең тиешле чараларын үз вакытында башкарган аграрийлар өчен бигрәк тә. Биредә, Әлки районында, үсемлекләргә биш мәртәбә тукландыру кертелде. Беренчесе - авыл хуҗалыгы авиациясе ярдәмендә - кар эреп бетүгә үк, икенче тапкыр - кырларга керү мөмкин булуга - җир өсте тараткычлары ярдәмендә, һәм өч мәртәбә тамырдан тыш тукландыру үткәрелде. Шактый җитди корткычлар дулкыны күзәтелде, ләкин аларны ярала башлауга ук юкка чыгаруга ирештек.

Кама аръягы Татарстанның икмәккә бай төбәге санала. Биредә ел саен республикада үстерелгән барлык азык-төлек бодаеның 40-45%ы игелә.

- Безнең ашлык сыйфаты буенча Казахстанныкына туры килә, - дип саный Айрат Хәйруллин. - Гәрчә кайберәүләр, Татарстанда бары тик фуражлык орлык кына җитештерелә дисәләр дә, бу бөтенләй дөрес түгел! Бары тик технологияләрне сакларга гына кирәк, һәм яхшы уңыш үстерергә була. Быел мул уңыш җыеп алу нәтиҗәсендә барлык шәһәрлеләрне дә сыйфатлы икмәк белән тәэмин итә алырбыз дип ышанам.