Хезмәт базарына анализ: Татарстанда эшсезлек дәрәҗәсе 0,16 процентка кадәр кимегән

«Пандемиядән, санкцион басымнан һәм квалификацияле кадрлар агымыннан соң икътисад элеккеге кебек эшсезлекнең югары дәрәҗәсе белән түгел, ә эшче көчләр кытлыгы белән очрашты. Татарстанда халыкның мәшгульлек дәрәҗәсе 62,4% тәшкил итә, ә теркәлгән эшсезлек дәрәҗәсе – 0,16%», – дип сөйләделәр матбугат хезмәтендә.

Хезмәт базары вакансияләр санының кимүе һәм хезмәт хаклары үсешенең акрынаюы белән характерлана. Шул ук вакытта эзләнү активлыгы узган елдан бирле үсүен дәвам итә. Бу көндәшлек дәрәҗәсендә яхшы чагыла: 2024 елда Татарстанда бер вакансиягә 3,2 резюме туры килсә, 2025 елда – 6,2.

Хезмәт базарына цифрлаштыру сизелерлек йогынты ясый. Эш эзләү һәм персонал сайлау хәзер цифрлы платформалар аша бара, шул исәптән «Россиядә эш» ярдәмендә. Бу эш эзләүчеләргә туры килә торган вакансияләрне тизрәк табарга, ә эш бирүчеләргә үзара хезмәттәшлекнең традицион ысулларын читләтеп, кандидатураларны нәтиҗәле сайларга мөмкинлек бирә.

«Мәшгульлекнең яңа формалары барлыкка килү тагын бер мөһим тенденциягә әйләнде. Бу дистанцион эш, сыгылмалы график, аутсорсинг, платформалы мәшгульлек һәм кайбер бурычларны автоматлаштыру. Мондый формалар халыкның яңа төркемнәрен – балалы хатын-кызларны, студентларны, пенсионерларны хезмәт базарына җәлеп итүгә ярдәм итә», – дип билгеләп үттеләр матбугат хезмәтендә.

Чыганак: «Татар-информ»