Красноармейская урамында шәхси йортта янгын чыга, аның нәтиҗәсендә берничә корылма утсыз калган. Янгын нәтиҗәсендә Елгачылар һәм Мебель фабрикасын тоташтырып торучы күпер ябылган. Вакыйга урынына янгын сүндерүчеләр, ашыгыч ярдәм килгән.
Янгын турында хәбәр Гадәттән тыш хәлләр министрлыгына көн уртасында керә. Гомуми мәйданы 40 квадрат метр булган бер катлы агач өй янган.
Янып торган өйдән өлкән яшьтәге ир-атны коткарганнар.
— Янгын нәтиҗәсендә торак йортка зыян килгән. 1959 елгы ир-ат пешү җәрәхәтләре алган. Хәзерге вакытта янгын чыгу сәбәпләре ачыклана, — дип хәбәр итте Чистай районы буенча күзәтчелек эшчәнлеге һәм кисәтү эшләре бүлегенең өлкән тикшерүчесе Илнур Гайнуллин.
64 яшьлек ир-ат үзе янгынны сүндермәкче булган, әмма, ни кызганыч, аның башы, аяк-куллары пешкән. Нәтиҗәдә, ул каты пешү җәрәхәтләре алган.
Чистай үзәк хастаханәсеннән хәбәр итүләренчә, ир-ат уртача авыр хәлдә. Дәвалау планы Республика клиник табиблары белән килештерелгән. Алар белән көндәлек консультацияләр үткәрелә. Хәле начарланган очракта ул РКБның пешкән авыруларны дәвалау үзәгенә җибәреләчәк.
Район тормышына кагылышлы иң мөһим яңалыкларыбызны «Чистополь-информ» Telegram-каналыбызда да укыгыз
Нет комментариев