Гөлсинә Гыйльманова үзенә һөнәрне йөрәге кушуы буенча сайлаган

Аның һөнәре физик һәм рухи көч таләп итә. Бу өлкәдә эшләү җиңел түгел, чөнки һәр кеше дә башкаларның хәленә керә, кызгана, ярдәм итә, шул ук вакытта социаль хезмәтләрнең тулы җыелмасын күрсәтә алмый.

Социаль хезмәткәрнең эш көннәре киеренке. Гөлсинә Рәфыйк кызының эш көне, барлык хезмәттәшләренеке кебек үк, иртәнге сигездән кичке бишкә кадәр дәвам итә. Хатын-кыз көн саен үз карамагындагылар янына бара. Шуларның бишесе – гомуми авыру буенча инвалид, алтысы – яшь буенча пенсионер.

Өлкәннәрне һәм инвалидларны озак вакытлы карау системасы кысаларында, өч тәрбияләнүчегә хезмәт күрсәтә.

Безнең героинябыз, авырлыклар булуга карамастан, үз эшен ярата. Кайвакыт тәрбияләнүчеләр янына ял көннәрендә дә, төнлә дә барырга туры килә. Өлкәннәр теләсә кайсы вакытта шалтырата алалар, чөнки төрле хәлләр килеп чыга.

Кибеткә азык-төлек яки даруханәгә дарулар алырга бару, коммуналь хезмәтләр өчен түләү, фатирны җыештыру һәм өйдәге башка эшләр, ашарга әзерләү, кер юу һәм үтүкләү – Гөлсинә Гыйльманова башкарган хезмәтләрнең бу әле тулы исемлеге түгел. Кәгазь эше белән дә шөгыльләнергә: пенсия, субсидияләр, ташламалар рәсмиләштерергә ярдәм итәргә туры килә. Әмма Гөлсинә Рәфыйк кызы үзе өчен эшләгән кебек намуслы хезмәт итә.

– Минем эшем миңа уңай хис-кичерешләр, шатлык һәм канәгатьлек китерә. Димәк, мин кирәкле эш башкарам! Минем карамагымда булганнарның туганнары башка шәһәрләрдә яши, ә кайберләренең бөтенләй юк. Алар минем өчен гаилә әгъзаларым кебек якын. Без алар белән турыдан-туры аралашып кына калмыйбыз, телефон аша да сөйләшеп торабыз, – ди хатын-кыз.

Эш көне тәмамлангач, Гөлсинә Рәфыйк кызы өенә ашыга. Монда аны үз гаиләсе түземсезлек белән көтә. Очы-кырые булмаган эшләр агымында хатын-кыз үзенең мавыгуларына да вакыт таба: бакчачылык, гөлләр үстерү белән шөгыльләнә.

Гөлсинә Гыйльманованың хезмәтен җитәкчелек дә бәяли. Ул «Балкыш» халыкка комплекслы социаль хезмәт күрсәтү үзәгенең, социаль яклау бүлегенең Рәхмәт хатлары һәм Мактау грамоталары белән бүләкләнгән.