600дән артык Татарстан студенты агросәнәгать комплексы предприятиеләрендә эшли

Җәйге сезонның иң кызган вакытында кырларда 200гә якын кеше эшли, әмма төп эш язгы чәчү һәм көзге урып-җыю кампанияләре чорына туры килә. Шулай итеп, студент отрядлары иң киеренке айларда аграр сектор өчен ышанычлы кадрлар ярдәменә әверелә.

Студентлар хезмәт отрядларының республика үзәге директоры, Россия студентлар отрядларының Күзәтчелек советы рәисе урынбасары Василий Ислаев сүзләренә караганда, яшьләрне агросәнәгать комплексына җәлеп итү – стратегик яктан мөһим юнәлеш.

– Бу сезонлы кыр эшләре чорында кадрлар кытлыгын капларга һәм бер үк вакытта тармак өчен мотивацияле белгечләр әзерләргә мөмкинлек бирә. Узган ел Татарстанның авыл хуҗалыгы предприятиеләрендә 737 кеше эшләде, быел без аларның санын арттырабыз, чөнки бу юнәлеш төбәк өчен стратегик яктан мөһим. Республика предприятиеләре бик яхшы шартлар тәкъдим итә, шуңа күрә яшьләр производствога беркетелә, – дип билгеләп үтте Ислаев.

Студентлар арасында иң кирәкле һөнәр механизатор булып кала – бу юнәлештә урып-җыю эшләрендә 147 кеше эшләячәк. Студентлар яшелчә һәм җиләк-җимеш уңышын җыюда да актив ярдәм итәләр. Икенче ел рәттән алар Әлмәт районында кәбестә алуда катнашалар, ә җәй ахырында беренче тапкыр Чүпрәле районында алма җыюда катнашачаклар.

Шунысы мөһим, предприятиеләрдә эшли башлар алдыннан студентлар бушлай һөнәри белем ала. 2026 елда Татарстанның алты мәгариф учреждениесендә 12 авыл хуҗалыгы белгечлеге буенча 728 кеше әзерләячәкләр. Язгы уку агымын 458 студент узган, тагын 270 кеше көзен белгечлек алачак.

Кадрлар әзерләү буенча лидер булып Казан дәүләт аграр университеты кала – быел анда 440 катнашучы белем ала, бу барлык тыңлаучыларның 60 процентын тәшкил итә. Иң популяр белгечлек авыл хуҗалыгы производствосы тракторчы-машинисты булган, аны 300дән артык студент сайлаган. Моннан тыш, 50 кеше агросәнәгать комплексы өчен пилотсыз авиация системалары операторы һөнәрен үзләштерә.

2026 елның җәендә Россия буенча авыл хуҗалыгы юнәлешендә Россия студентлар отрядларының 15 меңнән артык катнашучысы җәлеп ителәчәк. Яшь белгечләр илнең төрле төбәкләрендәге предприятиеләрдә зоотехниклар, механизатор ярдәмчеләре, ветеринарлар, технологлар һәм агрономнар сыйфатында эшләячәк.

Чыганак: Татар-информ