Студентлар 1,4 меңнән артык кешегә ярдәм иттеләр
Татарстанда «Игелекле эшләр десанты» республика патриотик акциясе ахырына якынлашты. Атна дәвамында Татарстаннан 70 студент отрядында катнашучы биш район халкына: Балык Бистәсе, Мамадыш, Арча, Апас һәм Әлмәттә яшәүчеләргә шефлык ярдәме күрсәтте.
Десантның төп бурычы – аеруча мохтаҗларга көнкүреш ярдәме күрсәтү. Студентлар пенсионерларга, ветераннарга һәм махсус хәрби операциядә катнашучыларның гаиләләренә ярдәм иттеләр. Эшләр исемлегенә кара туфрак китерү һәм кишәрлекләрне кышка әзерләү өчен җир казу, утын яру һәм өю, ботакларны һәм карт агачларны җыештыру, ишегалларын яфраклардан чистарту, кишәрлекләрне тигезләү, тәрәзәләрне юу керде. Барлыгы 160тан артык гаилә ярдәм алды.
Аерым юнәлеш – мәктәп укучылары белән һөнәри юнәлешле һәм патриотик эш. Студентлар югары сыйныф укучылары белән очрашулар үткәрделәр, Россия студентлар отрядларының юнәлешләре һәм яшьләр өчен мөмкинлекләр турында сөйләделәр.
Кече яшьтәге укучылар белән иҗади мастер-класслар оештырдылар. Шулай ук десантчылар студент отрядларының район штабларын үстерүдә ярдәм итеп, җирле студентлар белән очраштылар.
Эштән тыш, катнашучылар район мәдәнияте белән танышу чараларына да вакыт таптылар.
Республикада «Игелекле эшләр десанты» акциясе «Россия студент отрядларының кар десанты» Бөтенроссия патриотик акциясе кысаларында ел әйләнәсе уза. 2026 елда Татарстанның студотрядларында катнашучылар 16 меңнән артык кешегә ярдәм иттеләр, республиканың 23 районына 38 тапкыр чыктылар. Акциядә 490 кеше катнашты, Хезмәт вахтасының гомуми сәгате 22 меңнән артып китте.
Татарстан студентлар отрядларының эшчәнлеге «Яшьләр һәм балалар» милли проекты максатлары кысаларында Яшьләр эшләре министрлыгы тарафыннан координацияләнә.
Чыганак: Татар-информ
Нет комментариев