Күчемсез милекне теркәүгә документлар тапшырганда биометриядән файдалану: нәрсә белергә кирәк

2026 елның 1 июленнән гражданнарга күчемсез милекне электрон рәвештә теркәү өчен документлар тапшырганда биометрияне файдаланырга мөмкинлек бирә торган законнар үз көченә керде. Бүген ТР Росреестры җитәкчесе урынбасары Нияз Галиәкбәров белән әңгәмәдә биометрияне куллануның өстенлекләре нәрсәдә һәм күчемсез милекне электрон рәвештә теркәүгә документлар тапшыру өчен аны ничек кулланырга кирәклеге турында сөйләдек.

– Биометрияне куллануның өстенлеге нәрсәдә?

– Элегрәк күчемсез милек белән электрон килешүләр төзү өчен хокук иясенә Бердәм дәүләт күчемсез милек реестрына электрон документлар нигезендә милек хокукын теркәү мөмкинлеге турында махсус билге кертергә кирәк иде.

Хәзер теркәүгә электрон документларны мондый билге кертмичә генә җибәрергә мөмкин, әгәр килешү буенча документлар көчәйтелгән квалификацияле электрон имза белән имзаланган, ә хокук иясенең шәхесе «Биометрик шәхси мәгълүматларны кулланып физик затларны идентификацияләү һәм аутентификацияләүнең бердәм системасы» ярдәмендә расланган булса.

– Биометрия ярдәмендә хокукларны теркәгәндә гамәлләр алгоритмы нинди?

– Башта расланган биометрияне теркәргә кирәк: Бердәм биометрик система сайтында, Дәүләт хезмәтләре порталында яки Россия Банкы сайтында банк бүлекчәсен сайларга кирәк. Үзегез белән паспорт, СНИЛС булырга тиеш. Шулай ук сездә Дәүләт хезмәтләре порталында расланган исәп-хисап язмасы булырга тиеш. Хезмәткәр сезне фотога төшерәчәк, тавышыгызны яздырачак һәм барлык кирәкле мәгълүматны сораячак. Теркәлү вакытында биометрик шәхси мәгълүматларны эшкәртүгә ризалык имзаларга тәкъдим ителәчәк.

– Биометрияне раслаганнан соң нәрсә эшләргә кирәк?

– Дәүләт хезмәтләре порталында күчемсез милек сатып алу сервисыннан файдаланыгыз. Килешүнең барлык якларында физик затларда расланган биометрия булырга тиеш. Сервис килешү шартлары турында сораштыру узарга һәм биометрия ярдәмендә шәхесне расларга сораячак. Система алынган сурәтне Бердәм биометрик система мәгълүматлары белән чагыштырсын өчен, йөз буенча тикшерү узарга кирәк булачак. Моның өчен сезнең компьютер веб-камера белән җиһазландырылган булырга тиеш.

Алга таба барлык кирәкле документларны теркәп, электрон рәвештә сату-алу килешүе әзерләргә кирәк. Көчәйтелгән квалификацияле электрон имза белән гаризаларга кул куярга һәм пакетны Росреестрга теркәүгә җибәрергә. Теркәлү гамәлләрен башкарганнан соң, Дәүләт хезмәтләре порталында сезнең шәхси кабинетка Бердәм дәүләт күчемсез милек реестрыннан милек хокукын раслаучы өземтә җибәреләчәк.

–Биометрия ярдәмендә башкарылган килешүләрнең иминлеге ничек тәэмин ителә?

–Биометрия шифрланган хәлдә башка шәхси мәгълүматлардан аерым саклана һәм дәүләт системасының саклана торган контурыннан чыкмый. Биометрия көчәйтелгән квалификацияле электрон имзага өстәмә буларак кулланыла. Әлеге ике факторның бергә кушылуы электрон килешүләр үткәргәндә гражданнарның максималь дәрәҗәдә яклануын тәэмин итәчәк.

Шулай ук шәхси мәгълүматларны һәм күчемсез милекне мошенниклардан саклау өчен төп кагыйдәләрне истә тоту мөһим:

Дәүләт хезмәтләре порталындагы шәхси мәгълүматларны һәм аккаунт мәгълүматларын, шулай ук дәүләт хезмәтләре порталыннан һәм банклардан килгән СМС һәм хәбәрнамәләрнең эчтәлеген беркемгә дә хәбәр итмәгез;

Бердәм дәүләт күчемсез милек реестрына хокук иясенең шәхси катнашыннан башка теркәү мөмкин булмавы турында язма кертү турында гариза бирегез;

өченче затларга үзегезнең күчемсез милегегез һәм документлар турында мәгълүматны сөйләмәгез;

Дәүләт хезмәтләре порталында шәхси кабинетка парольне даими үзгәртегез;

шикле сылтамалар буенча күчмәгез.

Матбугат хезмәте