Кире кайтарылмый торган авиабилет өчен акчаны ничек кайтарырга

Чистайда яшәүче хатын-кыз туристлык агенты аша кире кайтарылмый торган авиабилет сатып алган. Әмма берникадәр вакыттан соң аңа авиакомпаниянең расписаниене үзгәртүе турында хәбәр итәләр. Бу хатын-кызның планнарына кермәгән, чөнки бу очракта аңа аэропортта башка рейска күчеп утыру өчен бер тәүлектән артык көтәргә туры килгән булыр иде.
Авиабилет өчен акчаны кире кайтаруда ярдәм итүне сорап, хатын-кыз Чис­тай дәүләт алкоголь инспекциясенең территориаль органына мөрәҗәгать итә. Ведомство белгечләре моны ничек эшләргә кирәклеге турында җентекле аңлатмалар бирәләр.

Сүз уңаеннан
Кире кайтарылмый торган билет дип кире тапшырып булмый торган билетларны атыйлар. Авиакомпания өчен мондый билетлар самолетта урын өчен акча алу гарантиясе, ә пассажирга акчаны янга калдыру булып тора. Мондый билетлар гадәти билетлардан арзанрак. Исеменә карамастан, кире кайтарылмый торган тариф буенча билет өчен акчаны кире кайтарырга мөмкин.
Россиядә кире кайтарылмый торган авиа­билетлар 2014 елда РФ Һава кодексына кертелгән махсус төзәтмәләр ярдәмендә барлыкка килде. Шул вакыттан бирле пассажирлар арзанрак тарифлар (планнар үзгәргән очракта акчасыз калу куркынычы бар) һәм кыйммәтрәк, әмма кире кайтарып була торган билетлар арасында сайлый алалар. Һәр авиакомпаниянең кире кайтарылмый торган билетларны куллану кагыйдәләре бар.

— Кире кайтарылмый торган билет сатып алганда, пассажир аннан фай­далана алачагын төгәл белергә тиеш, — дип аңлата ТР Дәүләт алкоголь инспекциясенең Чистай террито­риаль органының эчке базарны үстерү һәм координацияләү бүлеге башлыгы Светлана Саломеева. — Әгәр сәяхәт барып чыкмаса, акча пассажирларны ташучыда калачак. Әмма авиакомпания пассажирга акчаны кире кайтарырга мәҗбүр булган очраклар да бар.
РФ Һава кодексының 108нче мад­дәсенең 2нче пункты нигезендә кире кайтарылмый торган билетны кире кайтарырга һәм аның өчен пассажир түбәндәге очракларда акча алырга мөмкин:
— пассажирның яки аның белән бергә очкан гаилә әгъзасының, якын туганының авыруы;
— пассажирның гаилә әгъзасы яки якын туганының үлеме;
— авиакомпаниянең пассажирларны йөртү килешүе буенча йөкләмәләрен үтәмәве яки тиешенчә үтәмәве. Мәсә­лән, рейсны туктату яки берничә сәгатькә тоткарлау.
РФ Һава кодексында гаилә әгъзалары булып: ир белән хатын, ата-аналар һәм балалар (уллыкка (кызлыкка) алучылар һәм тәрбиягә алынган балалар), якын туганнар — әби-бабайлар һәм оныклар, бертуганнар һәм үги абый-апалар тора дип язылган.
Билетны югарыда күрсәтелгән нигезләр буенча кире кайтару өчен, аларны документаль рәвештә расларга кирәк.
— Кире кайтарылмый торган авиабилет өчен акчаны кире кайтару өчен паспорт, авиабилет күчермәсе, кире кайтаруга гариза кирәк булачак. Акчаны кире кайтарырга теләү турында самолетка теркәлү башланганчы хәбәр итәргә кирәк. Шуның белән бергә, авиа­билетны тапшыру һәм акча алу өчен, билетта күрсәтелгән рейска пассажирларны теркәү вакыты тәмамланганчы, авиакомпаниягә раслаучы документлар тапшырырга кирәк, — дип билгеләп үтә белгеч.
Светлана Саломеева сүзләренә караганда, кире кайтарылмый торган билет өчен акчаның бер өлешен, хәтта җитди сәбәп булмаса да, кире кайтарырга мөмкин. Закон буенча тарифны гына кире кайтарылмый торган итеп ясарга мөмкин. Россия авиакомпанияләре мондый билетны тиешле сәбәпсез кайтарганда клиентларга аэропорт һәм ягулык җыемнарын, шулай ук броньлау өчен җыемны капларга тиеш.
Дәүләт алкоголь инспекциясенең Чис­тай территориаль органы белгеч­ләре аларга мөрәҗәгать иткән хатын-кызга турагентка карата дәгъва төзергә ярдәм иттеләр һәм тиешле тәкъдимнәр бирделәр.