Бүген Татарстан Дәүләт Советының парламент үзәгенә 20 ел тулды

Яңа бинага күчү ул елларда заманча технологияләргә, цифрлаштыруга һәм хакимиятнең ачыклыгына басым ясаган республиканы киң колачлы яңартуның бер өлеше булды. Бу хакта ТР Дәүләт Советы матбугат хезмәте хәбәр итә.

Тантана өченче чакырылыш Дәүләт Советының 26нчы утырышы алдыннан узды. Символик тасманы Татарстанның беренче Президенты, республиканың Дәүләт Киңәшчесе Минтимер Шәймиев, Дәүләт Советының Мактаулы Рәисе (2006 елда – Дәүләт Советы Рәисе) Фәрит Мөхәммәтшин һәм Татарстан Республикасы Рәисе (2006 елда – Премьер-министр) Рөстәм Миңнеханов кистеләр.

Парламент эшенең яңа дәрәҗәсе

Үзәк ачылу белән Дәүләт Советы эше яңа технологик дәрәҗәгә күтәрелде: депутатларны теркәү системасы яңартылды, электрон тавыш бирү кертелде, заманча телевизион комплекс урнаштырылды. Утырышлар заллары синхрон тәрҗемә һәм теле-, радио - һәм интернет-трансляцияләр өчен җиһазлар белән җиһазландырылган. Бинада шулай ук китапханә, музей, рәсми делегацияләрне кабул итү залы һәм матбугат өчен бүлмәләр урнаштырылган.

Парламент үзәге ачык мәйданчыкка әйләнде: бирегә даими рәвештә чит ил делегацияләре, студентлар һәм мәктәп укучылары килә. Укучылар өчен парламент эше һәм закон чыгару нигезләре белән таныштыручы экскурсияләр үткәрелә.

«Җаваплы дәвамчанлык»

Фәрит Мөхәммәтшин үзәкнең ачылуын тарихи вакыйга дип атады һәм элеккеге утырышлар залының парламентка совет чорыннан ук эләгүен искәртте.

«Мөгаен, күпләр республика өчен хәлиткеч карарлар – Дәүләт суверенитеты турында декларация, Татарстан Конституциясе кабул ителгән, республикабызның киләчәге турында бәхәсләр барган иске залны сагыналардыр. Депутатлар корпусының шундый ук җаваплы дәвамчанлыгы бу биналарда да сакланыр дип уйлыйм», – дип аның сүзләрен китерә матбугат хезмәте.

Ике дистә ел эчендә парламент үзәге Татарстанның сәяси тормышында төп мәйданчыкларның берсенә әверелде: биредә Дәүләт Советы утырышлары уза, республика өчен мөһим карарлар кабул ителә һәм җәмәгатьчелек белән очрашулар оештырыла.

Чыганак: Татар-информ