Владыка Пахомий Изге Никольский кафедраль соборында хушлашу Литургиясе үткәрде

19 июльдә, преподобный Афанасий Афонскийны искә алу көнендә, Изге Никольский кафедраль соборында собор Литургиясе узды, аны Борович һәм Пестово епискобы Пахомий җитәкләде. Бу гыйбадәт архипастырь өчен хушлашу чарасы булды – ул аның Чистай җирендә хезмәт итү чорын төгәлләде.

Владыкага Чистай районы округлары благочинныйлары һәм храмнар клириклары ярдәм иттеләр. Гыйбадәт вакытында мәхәллә кешеләре гыйбадәт кылды, алар өчен бу көн аеруча күңелгә үтеп керерлек атмосфера белән тулды.

Литургия тәмамлангач, епископ Пахомийга руханилар һәм гади кешеләр исеменнән протоиерей Павел Чурашов мөрәҗәгать итте. Рухани владыкага догалары һәм архипастырлык хезмәтләре, бергә хезмәт иткән елларда туплаган яңа тәҗрибә, шулай ук чиркәү тормышына күрсәткән мөнәсәбәте өчен рәхмәт белдерде. Күптән түгел узган юбилее уңаеннан Павел атакай архипастырьга истәлекле бүләк тапшырды.

Җавап сүзендә епископ Пахомий җыелганнарга хөрмәт һәм ярдәм күрсәтүләре өчен рәхмәт сүзләре белән мөрәҗәгать итте.

– Чистайда үткәргән елларым күңелемдә мәңгегә калачак. Догада булыгыз, – диде владыка.

 

Гыйбадәт тәмамланганнан соң клириклар һәм мәхәллә кешеләре, фатиха сорарга дип, архипастырь янына бардылар. Бу көнне соборда булганнарның күбесе күз яшьләрен тыя алмады – яраткан владыкалары белән хушлашу чистайлылар өчен чын-чынлап дулкынландыргыч вакыйга булды.