Чистайда автор-башкаручы Марина Архангельскаяның бенефисы булды

Үзәк китапханәдә шагыйрь, музыкант, рәссам һәм җәмәгать эшлеклесе, «Ступени» әдәби берләшмәсе әгъзасы Марина Архангельскаяның «Шагыйрь кәеф тудыра» исемле иҗат кичәсе узды. Кунаклар арасында каләмдәш дуслары, китапханә хезмәткәрләре, «Ступени» әдәби берләшмәсе әгъзалары һәм Марина Викторовна иҗатын хөрмәт итүчеләр бар иде. Кичәне китапханәче Елена Быкова әзерләде һәм үткәрде.

Марина Архангельская үзенең тормышы һәм иҗаты турында фильм, шулай ук шигырьләре һәм картиналары кергән китаплар һәм җыентыклар тәкъдим итте. Ул үз әсәрләрен укыды, автор җырларын һәм инде вафат булган җирле авторлар – Рифкать Гардиев, Владимир Белов һәм Татьяна Вотинованың шигырьләренә җырлар башкарды. Марина Викторовна шигъриятенең шактый өлеше туган якны, Чистайны һәм аның табигатен яратуга багышланган. Аның патриотик юнәлештәге, шул исәптән махсус хәрби операциягә багышланган әсәрләре дә бар.

Марина Архангельская муниципаль район мәдәния­тен үстерүгә керткән шәхси өлеше өчен мәдәният бүлегенең Рәхмәт хатына лаек булды. Бүләкне аңа китапханә системасы директоры Ирина Герасимова тапшырды.

Хатта болай диелгән:

«Сезнең иҗатыгыз сәнгатькә чын күңелдән хезмәт итүнең ачык үрнәге булып тора һәм якташларыгызның йөрәгендә тере кайтаваз булып яңгырый, ә иҗтимагый эшчәнлегегез мәдәни традицияләрне ныгытуга һәм үсеп килүче буынны тәрбияләүгә ярдәм итә».

Бу көнне котлаулар күп булды, бүләкләр һәм чәчәкләр тапшырылды. Кичә чәй табыны артында тәмамланды.

Марина Архангельская тумышы белән Йошкар-Оладан, әмма аның тормышы Чистай белән тыгыз бәйләнгән. Институттан соң аның әти-әнисе юллама буенча Черепашьега эләккән, анда гаилә өч ел яшәгән, ә аннары Чистайга күченгән. Биредә Марина 17нче мәктәптә укыган. Рәсем ясау белән мавыгуы аңа майлы буяулар белән пейзажлар язарга яраткан әнисеннән күчә. Мәктәп елларында шәһәрдә сәнгать мәктәбе булмаган, шуңа күрә Марина Викторовна рәсем сәнгате белән лаеклы ялга чыккач Чистайның талантлы рәссамы Наилә Нигъмәтҗановада җитди шөгыльләнә башлый. Табигатькә мәхәббәт һәм балык тотарга ярату аңа әтисеннән күчкән: аның белән бергә ул Чулман буйлап йөргән һәм бу тәэсирләр соңрак «Утро на Каме» шигырендә һәм «За мечтой» җырында чагыла.