Мошенниклар Чистайның пенсионер укытучысыннан миллион сумга якын акча алдап алганнар

Мошенниклар Чистайда элек укытучы булып эшләгән 64 яшьлек ханымнан 985 мең сум акча алдап алганнар. Алдау схемасы мессенджердагы хәбәрдән башланган, анда хатын-кыздан электрон документ әйләнеше системасында «операцияне тәмамларга» сораганнар. Мәгариф өлкәсендәге элеккеге эшенә бәйле рәвештә бу хәбәр аңарда шик тудырмаган.

Аннары аңа үзләрен «Дәүләт хезмәтләре» порталы хезмәткәрләре дип таныштырган кешеләр шалтыраткан. Алар аның шәхси кабинетын ватып керүләрен, ә шәхси мәгълүматлар кредитлар алу яки хәтта «террорчыларны финанслау» өчен файдаланылырга мөмкин булуын белдергәннәр.

Шуннан соң элемтәгә үзен прокуратура хезмәткәре дип таныштырган ир-ат чыккан. Ул хатын-кызны аңарга җинаять җаваплылыгы янавын ышандырган һәм барлык акчаларын ашыгыч рәвештә янәсе казначылык тарафыннан контрольдә тотыла торган махсус «куркынычсыз» счетка күчерергә киңәш иткән.

Курыккан пенсионер ханым әлеге счетка үзенең барлык тупланмаларын – 985 мең сум акчасын күчергән. Алдау корбаны булуын аңлап, ул полициягә мөрәҗәгать иткән. Мошенниклык очрагы буенча җинаять эше кузгатылган.

Татарстан Республикасы буенча Эчке эшләр министрлыгында гражданнарны уяу булырга чакыралар: беркайчан да чит кешеләргә кодлар һәм парольләр хәбәр итмәгез, янаулар белән яисә дәүләт органнары, яки банк хезмәткәрләре булып шалтыратучы таныш булмаган кешеләр үтенече буенча акча күчермәгез. Теләсә нинди шикле шалтыратулар булганда шунда ук сөйләшүне туктатыгыз һәм полициягә мөрәҗәгать итегез.

Г. Хәйруллина фотосы