Юрист хезмәткәрнең эштә кар чистартырга тиешме-юкмы икәнлеге турында сөйләде

Эш бирүче хезмәткәрне кар чистартырга мәҗбүр итә алмый, әгәр бу аның вазифаларында язылмаган булса. Мондый аңлатманы юридик фәннәр докторы, Россиянең атказанган юристы Иван Соловьев бирде.

Аның сүзләренә караганда, хезмәткәрдән бу бурычны үтәүне өч очракта гына таләп итәргә мөмкин:

1. Әгәр территорияне җыештыру аның хезмәт килешүендә яисә вазифаи инструкциясендә күрсәтелгән булса.

2. Әгәр хезмәткәр эшне ирекле башкарырга риза булса.

3. Әгәр эш өчен аерым өстәмә түләү тәкъдим ителсә.

«Хезмәт кодексы кар чистартуны өстәмә эш итеп рәсмиләштерергә мөмкинлек бирә. Барысы да килешүгә бәйле: кемдер баш тартырга мөмкин, кемдер бушлай эшләргә, ә кемдер өстәмә түләү өчен ризалашырга мөмкин», – дип аңлатты юрист.

Шул рәвешле, хезмәткәргә яңа бурычларны аның ризалыгы һәм хезмәт законнарын үтәү шарты белән генә йөкләргә мөмкин.

Чыганак: «Татар-информ»