Чистайлы мессенджерда сылтама буенча күчеп, 100 мең сумнан артык акча югалткан

Чистайда яшәүче 59 яшьлек хатын-кыз полициягә гариза белән мөрәҗәгать иткән. Ул үзенең банк картасыннан 105 500 сум урлануын хәбәр иткән. Шул ук вакытта мөрәҗәгать итүче картаны чит кешеләргә тапшырмавын һәм шикле сылтамалар буенча күчмәвен ассызыклаган.

Зыян күрүченең кәрәзле телефонын тикшерү барышында полиция хезмәткәрләре хатын-кызның шулай да мессенджерларның берсендә алынган сылтама буенча күчкәнен ачыклаган. Бу сылтама җинаятьчеләр тарафыннан конфиденциаль мәгълүматларны урлау өчен эшләнгән фишинг сайтына алып барган. Аның буенча күчкәннән соң мошенниклар банк картасына рөхсәтсез керү мөмкинлегенә ия булганнар һәм акчаларын урлаганнар.

Россия Эчке эшләр министрлыгының Чистай районы буенча тикшерү бүлеге тикшерүчесе тарафыннан «Банк картасыннан акча урлау» маддәсе буенча җинаять эше кузгатылган.

Татарстан Республикасы буенча Эчке эшләр министрлыгы гражданнарны Интернет челтәреннән файдаланганда уяу булырга чакыра:

• Тикшерелмәгән сылтамалар буенча күчмәгез.

• Шикле битләрне ачмагыз.

• Килгән мәгълүматны һәрвакыт җентекләп тикшерегез.