Чистайда 17 яшьлек яшүсмер банк картасын сату аркасында җинаять эше фигуранты булган

Чистайда 17 яшьлек яшүсмер үзенең банк картасын танышына 5 600 сумга саткан һәм җинаять эше фигуранты булган.

Җиңел акча эшләү теләге егет өчен җитди хокукый нәтиҗәләргә китерә. Картаны тапшырганнан соң яңа хуҗа банк счетына керү мөмкинлеге алган һәм аны законсыз операцияләр үткәрү өчен файдаланган.

Җинаять эше кузгатуга күрше төбәкнең тикшерү органнарыннан килгән материаллар нигез була: зыян күрүче исеменә микрозайм рәсмиләштерү нәтиҗәсендә алынган акчаны яшүсмер картасына күчергәннәр.

Россия Эчке эшләр министрлыгының Чистай районы буенча тикшерү бүлеге тикшерүчесе тарафыннан РФ Җинаятьләр кодексының 187нче маддәсенең 3нче өлеше – табыш алу ниятеннән электрон түләү чарасын башка затка хокуксыз операцияләр башкару өчен тапшыру буенча җинаять эше кузгатылган. Шикләнелүче тулысынча үз гаебен таныган һәм күрсәтмәләр биргән. Картаны сатып алган танышы РФ Җинаятьләр кодексының шул ук маддәсенең 5нче өлеше буенча җаваплылыкка тартылган.

Чистай районы полициясе банк картасын өченче затларга тапшыру тыела дип кисәтә, моның өчен җинаять җаваплылыгы булуы турында искә төшерә.