Чистай кешесе табылган банк картасыннан акча урлауда гаепләнә

Россия Эчке эшләр министрлыгының Чистай районы буенча кизү бүлегенә балигъ булмаган кызының банк картасыннан акча урлаулары турындагы гариза белән җирле кеше мөрәҗәгать иткән.

Гариза бирүче сүзләренә караганда, 14 яшьлек кыз урамда картасын югалткан. Өйгә кайткач, ул счеттан 1000 сумнан артык акча алынганын күргән.

Оператив-эзләү чаралары барышында җинаятьчеләрне эзләү хезмәткәрләре шикләнелүчене ачыклаганнар һәм тоткарлаганнар. Ул элек хөкем ителгән 23 яшьлек чистайлы булып чыккан.

Ир-егет картаны тапканын һәм аны спиртлы эчемлекләр сатып алу өчен кулланганын таныган.

Әлеге очрак буенча «Банк счетыннан урлау» маддәсендә каралган җинаять билгеләре буенча җинаять эше кузгатылган.

Полиция хезмәткәрләре чит банк карталарын куллану авыр җинаять буларак квалификацияләнә дип искә төшерәләр. Әгәр сез карта тапсагыз, аннан файдаланырга ашыкмагыз – бу җинаять җаваплылыгына китерергә мөмкин.

Чит картаны тапсагыз, нишләргә:

* кичекмәстән якындагы полиция бүлегенә мөрәҗәгать итегез;

* яки бу хакта картаны чыгарган банкка хәбәр итегез.