Чистайда бер хатын-кыз мошенникларга 60 мең сумга якын акча күчергән
Чистайда яшәүче хатын-кыз дача участогы өчен көнкүреш әйберләре саклау корылмасы сатып алырга теләгәндә зур суммада акчадан колак кагып, дистанцион аферистларның чираттагы корбаны булган. Бу хакта Россия эчке эшләр министрлыгы бүлегенең Чистай районы буенча матбугат хезмәте хәбәр итә.
Ведомство мәгълүматлары буенча, кизү бүлегенә йорты янындагы территорияне төзекләндерергә уйлаган җирле хатын-кыз мөрәҗәгать итә. Популяр интернет-мәйданчыкларның берсендә ул көнкүрештә кулланыла торган, нәкъ менә үзенә кирәк булган корылма күрә.
Сатучы белән элемтәгә кергәннән соң ул булачак сату-сатып алуның барлык детальләрен ачыклый. Алдакчы сатучы аңа тиз арада танышу өчен килешү җибәрә һәм товар бәясенең яртысын алдан түләүне сорый. Сатып алучы җибәрелгән документларны игътибар белән өйрәнә, анда бернинди дә шикле нәрсәләр күрми һәм күрсәтелгән счетка 58 900 сум акча күчерә.
Акчаны алганнан соң сатучының үз-үзен тотышы кисәк кенә үзгәрә. Башта ул махсус техниканың булмавына сылтый һәм китереп бирә алмауларын хәбәр итә. Шул вакытта хатын-кыз мөстәкыйль рәвештә товарны үз килеп аласын хәбәр итә, чөнки баштагы белдерүдә товарның Казанда булуы хакында әйтелгән була. Моңа җавап итеп, аферист объектның Түбән Новгородка «күченүен» хәбәр итә. Моңардан тыш, мошенниклар сатып алучыдан калган сумманы күчерүен таләп итә башлый.
Үзенең мошенниклар ятмәсенә эләгүен аңлап, хатын-кыз хокук саклау органнарына мөрәҗәгать итә. Хәзерге вакытта әлеге эш буенча «Мошенниклык» маддәсе нигезендә җинаять эше ачылган.
Полиция хезмәткәрләре явыз ниятле кешеләрнең шәхесләрен ачыклау өчен барлык кирәкле тикшерүләрне үткәрә.
Нет комментариев