Участокта чүп-чарны дөрес яндырабыз: штраф алмас өчен нәрсә эшләргә ярый һәм ярамый

Сентябрь – агач, куакларның коры ботакларын кисү, участокны бәрәңге һәм башка үсемлекләрнең чүбеннән чистарту вакыты. Иң җиңеле – аларны яндыру, әмма моны янгынга каршы кагыйдәләр буенча эшләргә кирәк. Муниципаль район буенча күзәтчелек эшчәнлеге һәм кисәтү эше бүлегенең өлкән инспекторы Илнур Гайнуллин белән бергә чүп-чарны дөрес яндырырга өйрәнәбез.

Нәрсә яндырырга ярый

– Үсемлек калдыкларын – коры үләнне, ботакларны, сабак-яфракларны, шулай ук кәгазь һәм картонны гына яндырырга ярый. Ә менә пластик, полиэтилен, резина, покрышкалар, көнкүреш химиясеннән шешәләр, пакетлар, линолеум кисәкләре һәм төзелеш чүп-чарларын яндыру катгый тыела. Янган вакытта алар агулы матдәләр бүлеп чыгаралар һәм моның өчен аерым штраф каралган, – дип аңлата күзәтчелек ведомствосы инспекторы.

Өч ысул, өч төрле ераклык

Кагыйдәләр учакның өч төрен аера. Корылмалардан никадәр ерак китәргә һәм урынны ничек әзерләргә кирәклеге шуңа бәйле.

Чокырда ачык учак. Тирәнлеге 30 сантиметрдан да ким булмаган һәм диаметры 1 метрдан да артмаган чокыр казыла. Якындагы корылмадан – 15 м, ылыслы урманнан – 100 м, яфраклы урманнан 30 м ара булырга тиеш. 10 м радиуста чокыр тирәли барлык янучан материалларны алып куярга һәм өстәмә рәвештә ут тирәсендәге территория киңлеге 40 сантиметрдан ким булмаган янгынга каршы полоса белән аерып алынырга тиеш, ул ялкынга үләнгә күчәргә ирек бирмәячәк.

Мичкә яки капкачлы бак. Күләме – 1 куб. метрдан артмаска, өсте металл капкач белән капланырга тиеш. Корылмаларга кадәр ара икеләтә – 7,5 метрга кадәр кыскара. Тирә-юньне чистарту зонасы – 5 м, минеральләшкән полоса кирәк түгел. Бу бакчачыларда иң популяр вариант: ул куркынычсызрак та, өйгә якынрак та куярга мөмкин.

Мангал яки тимер учак. Шашлык әзерләсәгез, таләпләр йомшаграк: корылмаларга кадәр 5 м, әйләнә-тирәдәге чистартылган зона – 2 м. Ләкин бу чүп-чарны утильләштерүгә түгел, ә ризык әзерләүгә генә кагыла.

Кул астында нәрсә булырга тиеш

Янгын сүндерү чаралары булмау – штраф салуның иң еш очрый торган сәбәбе.

Учак янында:

*янгын сүндергеч яки су тутырылган чиләк;

*көрәк;

*ком яки туфрак булырга тиеш.

Шулай ук берәр нәрсә килеп чыккан очракта 112гә шалтыратырга туры килсә, эшләүче мобиль элемтәнең булуы зарур.

Яндырырга ярамаган очраклар

Урын бик яхшы җиһазландырылган булса да, һава торышы буенча катгый чикләүләр бар:

*секундына 5 метрдан көчлерәк җил искәндә ачык учак ягарга ярамый;

*җил секундына 10 метрдан да көчлерәк булганда хәтта мичкә дә кулланырга ярамый;

*торфлы туфрак – җил нинди генә булмасын, тыелган;

*ылыслы агач ябалдашлары астында – тыела.

– Иң мөһиме – янгынга каршы махсус режим. Гадәттән тыш хәлләр министрлыгы аны төбәктә керткәндә, теләсә нинди ачык ут тыела, хәтта мичкәдә дә – ди Илнур Гайнуллин. – Мәгълүматны, гадәттә, массакүләм мәгълүмат чараларында, ведомство һәм административ сайтларда бастыралар. Татарстанда аерым режим еш кына язын һәм коры җәйге чорларда гамәлдә, әмма карарлар вәзгыять буенча кабул ителә.

Штрафлар

Янгынга каршы кагыйдәләрне бозган өчен 5 меңнән 15 мең сумга кадәр штраф яный. Янгынга каршы махсус режим шартларында – 10 меңнән 20 мең сумга кадәр. Әгәр бозу аркасында янгын чыккан икән – 40 мең сумнан 50 мең сумга кадәр. Ә ут белән саксыз эш итү җитди зыян китерсә, җинаять җаваплылыгы каралган.

Район тормышына кагылышлы иң мөһим яңалыкларыбызны «Чистополь-информ» Telegram-каналыбызда да укыгыз