Татарстанда «Гаилә» илкүләм проектына 17,6 млрд сумнан артык акча юнәлдереләчәк

Бу суммадан 2,6 млрд сум федераль бюджеттан киләчәк, тагын 15 млрд сумны республика тәэмин итәчәк, дип хәбәр итә ТР Икътисад министрлыгы матбугат хезмәте.

Акчаларның күп өлеше – 15,3 млрд сум ­– балалары булган гаиләләргә һәм күп балалы гаиләләргә ярдәм итүгә китәчәк. Бу төбәкнең социаль сәясәтенең төп юнәлеше булып кала.

Хакимият шулай ук өлкән буынга һәм мәдәниятне үстерүгә игътибар бирүне дәвам итә. Балалар бакчаларын, сәнгать мәктәпләрен, китапханәләрне, театрларны, музейларны һәм мәдәният йортларын төзү һәм капиталь ремонтлау планлаштырыла. Яңартылганнан соң учреждениеләр заманча җиһазлар белән җиһазландырылачак.

2025 ел нәтиҗәләре күрсәткәнчә, ярдәм чараларына ихтыяҗ зур. «Гаилә» проекты кысаларында 220 меңнән артык баланың ата-анасы бердәм пособие алды, балалар бакчасы өчен 108,5 мең компенсация бирелде, 58,8 мең күп балалы гаиләгә ярдәм күрсәтелде.

Яшел Үзән районында өлкәннәр өчен кайгырту йорты ачылды.

Моннан тыш, узган елда ике балалар бакчасы, балалар сәнгать мәктәбе, ике китапханә, ике мәдәният йорты, Казанның яшь тамашачы театры һәм Комаровлар фабрикасының тарихи бинасы ремонтланды.

2026 елда Татарстанда милли проектларга барлыгы 54 млрд сум каралган, шуның 29 млрд сумы – федераль һәм 25 млрд сумы – республика акчалары.

Төбәк 12 илкүләм проект составына кергән 45 төбәк проектта катнаша.

Чыганак: «Татар-информ»