Чистайның «Юлдаш» йорт-интернатында торак бүлмәләрне һәм азык-төлек блогын капиталь ремонтлыйлар

Чистайда «Юлдаш» картлар һәм инвалидлар өчен йорт-интернатны капиталь ремонтлау дәвам итә. Эшләр халыкка социаль хезмәт күрсәтү учреждениеләрен капиталь ремонтлау республика программасы кысаларында алып барыла.

Чистай муниципалитетында хәбәр итүләренчә, агымдагы елда ремонт эшләре учреждениенең төп өч зонасына: икенче каттагы торак бүлмәләргә, беренче каттагы кабул итү-карантин бүлегенә һәм азык-төлек блогына кагылды.

Төзүчеләр эшләрнең актив фазасына күчтеләр. Объектта түбәндәге эшләр башкарыла:

• штукатур һәм электромонтаж эшләр;

• вентиляция системасын ремонтлау;

• плитәләр җәю.

Подрядчылар мәгълүматлары буенча, объектның оператив әзерлеге 48 процент тәшкил итә.

Агымдагы елда социаль хезмәт күрсәтү һәм социаль яклау учреждениеләрен капиталь ремонтлау республика программасына барлыгы 28 объект кертелгән. Аларда эшләр график буенча, күзәтү органнарының контролендә алып барыла.

Чистай муниципаль районы фотолары

Район тормышына кагылышлы иң мөһим яңалыкларыбызны «Чистополь-информ» Telegram-каналыбызда да укыгыз