Чистай районында юлларда аварияләр саны арту күзәтелә

Муниципаль районның юл хәрәкәте иминлеген тәэмин итү комиссиясенең киңәйтелгән утырышы булды. Аварияләрне һәм юлларның торышын анализлауга багышланган киңәшмәне башкарма комитет җитәкчесе һәм комиссия рәисе Эдуард Хәсәнов алып барды.

Утырыш борчулы статистикадан башланды. Яңа елның беренче өч атнасында шәһәр һәм район юлларында килеп чыккан аварияләрдә 5 кеше һәлак булган. 4 гыйнварда «Алексеевск – Әлмәт» трассасында массакүләм авариядә дүрт кешенең гомере өзелгән, 16 гыйнварда шәһәрнең Красноармейская урамындагы күпердә юл-транспорт вакыйгасында тагын бер кеше һәлак булган – автомобиль юлда яткан җәяүлене бәрдергән.

– Ел башланырга өлгермәде, без 5 кешене югалттык инде, зыян күрүчеләр дә бар! – дип белдерде Эдуард Хәсәнов. – Безгә ашыгыч рәвештә чараларны көчәйтергә, һәр вакыйганы җентекләп тикшерергә һәм мондый хәл кабатланмасын өчен барысын да эшләргә кирәк!

Чистай районы буенча Дәүләт автоинспекциясе бүлеге начальнигы Дмитрий Зинин юллардагы вәзгыятьне җентекләп тикшерде. 1 гыйнвардан 19 гыйнварга кадәр 6 юл-транспорт вакыйгасы теркәлгән, аларда 5 кеше һәлак булган һәм 13 кеше зыян күргән. Узган елның шул ук чоры белән чагыштырганда, барлык күрсәткечләр буенча да үсеш күзәтелә.

Дмитрий Викторович юл-транспорт вакыйгаларының төп төрләренә аерым тукталды.

– Ике очракта транспорт чаралары бәрелешкән, 4 кеше һәлак булган, 10 кеше төрле дәрәҗәдәге имгәнүләр алган, җәяүлеләрне бәрдерүнең 3 очрагы килеп чыккан, 1 кеше һәлак булган, 2се имгәнүләр алган, 1 машина әйләнеп капланган, анда 1 кеше имгәнүләр алган, – диде доклад ясаучы.

Аварияләрнең төп сәбәпләре – тизлекне арттыру һәм җәяүлеләрнең юл йөрү кагыйдәләрен бозу.

Дмитрий Зинин билгеләп үткәнчә, кышкы чорда юлларның торышы канәгатьләнерлек булмавы җитди куркыныч факторга әверелә. 19 гыйнварда шәһәрдә үткәрелгән тикшерү бозулар ачыклаган: юл чатларында һәм җәяүлеләр кичүләре алдында кар өемнәре, шулай ук юлларда бозлавык урыннар бар.

Юл, коммуналь хезмәтләр вәкилләре, автотрассалар кураторлары федераль, төбәк һәм шәһәр юлларын чистарту буенча башкарыла торган эшләр турында хисап тоттылар. Фикер алышу нәтиҗәләре буенча комиссия төгәл йөкләмәләр бирде.

– Кыска вакыт эчендә күз күремен чикли торган барлык кар өемнәрен, бигрәк тә машина юлларына чыгу урыннарында һәм җәяүлеләр кичүләре янында бетерергә кирәк, – дип ассызыклады Эдуард Хәсәнов. – Юлларны һәм тротуарларны сыйфатлы чистартуны тәэмин итү таләп ителә.

Эдуард Хәсәнов мәктәп маршрутларына керә торган юлларга аерым игътибар бирергә һәм аларны кардан чистартуда авыл җирлекләренә тиешле ярдәм күрсәтергә кушты. Шулай ук җәяүлеләр кичүләрендә тәүлекнең караңгы вакытында һәм һава торышы начар булганда күрүне яхшырта торган өстәмә светодиодлы юл билгеләре урнаштыру кирәклеге турында карар кабул ителде.

Кисәтү эшенә аерым игътибар бирелде. Комиссия балалар мәгариф оешмаларында һәм өлкән буын социаль учреждениеләрендә аңлату эшчәнлеген көчәйтергә кирәклеген ассызыклады. Яктылыкны кире кайтара торган элементларны куллануның мөһимлегенә һәм барлык юл хәрәкәтендә катнашучыларның, бигрәк тә җәяүлеләрнең гади, әмма тормыш өчен мөһим куркынычсызлык кагыйдәләрен үтәвенә аерым басым ясалачак.

Утырышта кисәтү чараларының берсе буларак «Халык инспекторы» мобиль кушымтасын куллану инициативасы тәкъдим ителде, ул халыкка юл хәрәкәте кагыйдәләрен бозуларны ачыклауда актив катнашырга мөмкинлек бирә.

Кушымта ярдәмендә теләсә кайсы кеше кагыйдә бозу очрагы турында оператив рәвештә, аны турыдан-туры программада видеога теркәп, хәбәр итә ала. Әлеге материаллар алга таба тикшерү һәм чаралар күрү өчен тиешле контроль органнарына автомат рәвештә җибәрелә.

Сервистан файдалануның мөһим шарты булып түбәндәге кагыйдә тора: кагыйдә бозуларны җәяүлеләр яки транспорт чаралары пассажирлары гына терки ала. Төшерү вакытында руль артында булган кеше ясаган видеоязмалар тикшерүгә алынмаячак. Бу таләп юлда аварияләр булдырмау һәм тәкъдим ителә торган материалларның объективлыгын тәэмин итүгә юнәлдерелгән. Шул рәвешле, «Халык инспекторы» җәмәгать контроленең заманча коралына әверелә, һәр аңлы гражданинны юлларда иминлекне тәэмин итү өчен ярдәмчегә әверелдерә.