Теләче районында юл өчен 8 мең квадрат метрга якын шәхси җир алыначак

Татарстан Министрлар Кабинеты төбәк әһәмиятендәге «Шәдке –Зур Мәрәтәк» автомобиль юлын реконструкцияләү өчен Теләче районындагы ике шәхси җир кишәрлеген тартып алырга ниятли. Тартып алу турындагы документ хәзер коррупциягә каршы экспертиза уза.

Дәүләт ихтыяҗлары өчен югары Мәрәтәк авылы янындагы, Шәдке һәм Зур Мәрәтәк арасындагы 7,87 мең квадрат метр җир тартып алыначак. Гомуми мәйданы 232,8 мең квадрат метр булган ике кишәрлек авыл хуҗалыгы билгеләнешендәге җирләргә керә һәм хосусый милектә исәпләнә, аларның гомуми кадастр бәясе –577 мең сум.

Документ нигезендә, ТР җир һәм мөлкәт мөнәсәбәтләре министрлыгы карарны рәсми чыганакларда бастырачак, милекчеләргә җирләрне алу, зыян күләмен кайтару турында хәбәр итәчәк һәм килешү төзиячәк. «Главтатдортранс» кадастр эшләрен уздырачак, компенсацияләр күләмен билгеләячәк һәм килешү проектлары хуҗаларына юлланачак. Документларны имзалаудан баш тарткан очракта учреждение судка мөрәҗәгать итә алачак.

Чыганак: «Новости Татарстана - ТатарстанДа»