Поселокта яңа клуб булачак

Йолдыз поселогында яшәүчеләр муниципаль вәкилләре белән очрашуларда үзләрен дулкынландыра торган күп кенә проблемаларны билгеләгәннәр иде. Күп мөрәҗәгатьләрдә поселокта яңа клуб төзү зарурлыгы торды. Иске Мәдәният йорты замана таләпләренә җавап бирми. Бинаның тузуы сәбәпле, анда төрле чаралар үткәрү дә мөмкин түгел, электр үткәргечләр дә тузган. Йолдызда яшәүчеләр муниципаль район башлыгы Илдус Әхмәтҗановка әлеге хәлгә катнашуын сорап мөрәҗәгать иттеләр. Башлык шәхсән үзе урынга барып, клубны карады һәм авыл халкына яңа бина төзүдә ярдәм итәргә вәгъдә бирде. Проект эшләнде, ә инде 9 мартта Мәдәният йорты төзеләчәк урынга куәтле техника килде һәм нигез чокыры казый башлады. Әлеге хәбәр бер мизгелдә бөтен поселокка таралды һәм йолдызлылар шәхсән үзләре килеп эш барышын карадылар. Әлеге "экскурсияләр"нең нәтиҗәсе бер: "Бездә яңа клуб булачак". Бу фикер белән авыл халкы килеште. "Гранд-Строй" фирмасы төзелешнең генподрядчысы булды, ул үзен торак, шулай ук социаль тармак объектлары төзүдә яхшы яктан күрсәтте.