Дмитрий Иванов: «Яшүсмерләрнең зарарлы йогынтыга каршы кызыклы шөгыле булырга тиеш»

Фикер алышуның төп темасы яшьләр арасында террорчылык янауларын кисәтү, шулай ук мәгариф учреждениеләрендә иминлек мәсьәләләре булды.

Утырыш 2025 елга йомгак ясаудан башланды. Комиссия сәркатибе Ольга Заглядова планлаштырылган чараларның үтәлеше турында сөйләде. Чыгыш ясаучы билгеләп үткәнчә, эш планлы нигездә, агымдагы вәзгыятьне исәпкә тотып алып барылган. Районда даими рәвештә социаль-икътисади һәм сәяси процессларга мониторинг үткәрелә. Вәзгыять тотрыклы дип бәяләнә: протест активлыгы, милләтара яки дини низаглар теркәлмәгән.

Әмма, билгеләп үтелгәнчә, янаулар кала. Бүгенге көндә төп куркынычлар социаль челтәрләрдә экстремизм идеяләренең таралуы һәм телефон аша мошенниклыкның яңа схемалары белән бәйле. Гражданнарның җинаятьчеләр йогынтысында (шул исәптән Украина кол-үзәкләре) хокукка каршы гамәлләргә бару очраклары аеруча борчу тудыра.

– Без көн саен аңлату эшләре алып барабыз. Предприятие һәм оешма җитәкчеләре катнашында атна саен уздырыла торган планеркаларда хезмәткәрләргә һәм аларның якыннарына уяулык турында искә төшерергә кушыла. Массакүләм мәгълүмат чараларында һәм мессенджерларда мошенникларга ничек каршы торырга кирәклеге турында белешмәләр даими бастырыла, – дип ассызыклады Ольга Валентиновна.

Миграция сәясәте кысаларында комиссиянең эшче төркеме хокук саклаучылар белән берлектә чит ил гражданнары хезмәтеннән файдаланучы эш бирүчеләр белән очрашулар үткәрә. Җитәкчеләргә законнарны төгәл үтәргә киңәш ителә: чит ил хезмәткәрләренең патентлары булырга һәм алар хәрби исәптә торырга тиеш.

Мәктәпләргә һәм яшьләргә – игътибар

Утырышның төп өлеше үсеп килүче буынны террорчылык янауларыннан яклауга багышланган иде. Докладлар белән «Форпост» үзәге җитәкчесе Жасмена Саутина, мәгариф идарәсе җитәкчесе Ольга Купцова һәм авыл хуҗалыгы техникумы директоры вазифаларын башкаручы Евгений Назаров чыгыш ясадылар. Алар террорчылык һәм экстремизм идеологиясенә каршы эш, шулай ук уку йортларында буллинг һәм деструктив күренешләрне (шул исәптән «колумбайн»ны) кисәтү чаралары турында сөйләделәр. Полициянең участок уполномоченныйлары һәм балигъ булмаганнар эшләре бүлеге начальнигы урынбасары Эльмира Сибгатуллина яшүсмерләрнең кайда һәм күпме вакыт үткәрүләрен контрольдә тотуны көчәйтергә өндәде, игътибар үзәгендә – компьютер клублары. Ул шулай ук балаларның төнлә олылар озатуыннан башка урамда булуына юл куймау турында искәртте.

Төп мәсьәләләрнең берсе мәгариф объектларында үткәрү режимы булды. Эчке эшләр министрлыгының Чистай районы буенча бүлеге полиция начальнигы Сергей Атуров тикшерүләр нәтиҗәләре турында сөйләде. Комиссия әгъзалары иминлекне оештыруның уңай мисаллары һәм эшләп бетерүне таләп итә торган проблемалы моментлар турында фикер алыштылар. Район башкарма комитеты җитәкчесенең социаль мәсьәләләр буенча урынбасары Галина Задворнова да әлеге мәсьәләләр буенча үз тәкъдимнәрен җиткерде.

Деструктив йогынтыдан саклау

Утырышка йомгак ясап, Россия Федераль иминлек хезмәтенең Татарстан Республикасы буенча идарәсе башлыгы Рамил Нәҗмиев яшьләрне деструктив элементлар йогынтысыннан саклау буенча эшне көчәйтергә өндәде. Район башлыгы Дмитрий Иванов бу тәкъдимне хуплады һәм профильле хезмәтләргә күрсәтмә бирде.

– Яшүсмерләрне спорт, мәдәният, иҗтимагый файдалы эшчәнлек кебек уңай юнәлешләргә активрак җәлеп итәргә кирәк. Балалар һәм яшьләрнең читтән кергән зарарлы йогынтыга кызыклы һәм куркынычсыз альтернативасы булырга тиеш, – дип йомгак ясады Дмитрий Иванов.