Чистайның Никахлашу сараенда гаилә тормышы юбилярларын һәм күп балалы гаиләне хөрмәтләделәр

ЗАГС залында зөбәрҗәт юбилярлар Татьяна Алексеевна һәм Владимир Федорович Шведчиковларны котладылар, алар 27 декабрьдә 55 ел бергә гомер итүләрен билгеләп үтәчәкләр. Намуслы хезмәтләре һәм иҗтимагый эшчәнлекләре өчен алар күп кенә дәүләт һәм ведомство бүләкләренә ия булганнар, алар арасында «Мәхәббәт һәм тугрылык өчен» истәлекле Россия медале аерым урын алып тора. Аларның ике улы — Константин һәм Дмитрий бар.
Аннары бриллиант юбилярлар Равилә Закир кызы һәм Дамир Хаҗиәхмәт улы Мортазиннарны котладылар, алар 60 ел бергә, юлларындагы барлык авырлыкларны җиңеп, кулга-кул тотынышып баралар. Мортазиннар уллары Рамил белән кызлары Альмираны тәрбияләп үстергәннәр, шулай ук оныклары Равил, Дилия, Дамирә һәм Замирә бар.
Гадәткә кергәнчә, гаилә парлары Чистай районының Мактаулы юбилярлар китабына үз култамгаларын калдырдылар.
Гаилә елында, 16 ноябрьдә, Сабировлар гаиләсендә бишенче бала дөньяга аваз салды һәм күптән түгел алар гаилә тормышының бәллүр юбилеен билгеләп үттеләр. Илдус Инсаф улы һәм Айсылу Сәет кызының менә дигән балалары: Гүзәл, Илсаф, Азамат, Әгъзам һәм Илһам үсеп килә. Эшләре күп булуына карамастан, әти-әни балаларының мавыгуларына һәрвакыт вакыт табалар.
Чарада катнашучылар алдында 7нче номерлы балалар бакчасы һәм Никахлашу сараеның вокаль-инструменталь ансамбле чыгыш ясадылар.
Гаиләләрне котларга Чистай районы башлыгы Дмитрий Иванов һәм башкарма комитет җитәкчесенең социаль мәсьәләләр буенча урынбасары Галина Задворнова килде.
— Кадерле юбилярларыбыз, яшь, күп балалы гаилә. Сезне күркәм бәйрәм, Гаилә елы ябылу белән котлау минем өчен зур дәрәҗә. Алып баручы юбилярларның язмышы турында сөйләде һәм мин үз әти-әниемне күз алдына китердем. Минем әти-әнием 61 ел бергә яши. Быел шулай килеп чыкты, әнием авырап китте һәм дәваханәгә эләкте. Һәм һәрвакыт көчле рухлы булган әтине алыштырганнармыни. Яшертен генә күз яшен агызып ала, кулы эшкә бармый. Шунда мин аларның бер-берсен ничек яратуларын һәм бер-берсеннән башка яши алмауларын аңладым. 50 һәм аннан да күбрәк ел бергә яшәгән гаиләләр күбрәк булсын һәм безгә, чистайлыларга һәм россиялеләргә, алар үрнәк күрсәтсеннәр иде», — диде Дмитрий Алексеевич.
Җылы теләкләреннән соң Дмитрий Иванов юбиляр парларга һәм күп балалы гаиләгә Рәхмәт хатлары һәм бүләкләр тапшырды.
Чара азагында барысы да истәлеккә фотога төштеләр.