Гөмбә ашап ничек агуланмаска

Гөмбә – табигать бүләге. Ул тәмле генә түгел, ә файдалы матдәләргә дә бай: анда аксымнар, витаминнар һәм микроэлементлар бар. Әмма билгеле бер шартларда алар каты агулануга сәбәп була.

Роспотребнадзор идарәсенең Чистай территориаль бүлегендә гөмбәне ничек бутамаска һәм агуланмаска, шулай ук интоксикациянең беренче билгеләре вакытында нишләргә кирәклеге турында сөйләделәр.

Гөмбә белән агулану ничек бара?

Агулану – гөмбәдә булган токсиннар белән организмның интоксикациясе ул. Россиянең урта полосасында иң куркынычлары – агулы аксыл гөмбә һәм чебен гөмбәсенең кайбер төрләре.

Гөмбә белән агулануны сәламәтлеге какшаган кешеләр һәм балалар авыр кичерә.

Гөмбә белән агулану билгеләре:

косу һәм күңел болгану;

эч китү;

эч авырту;

кискен хәлсезлек.

Авыр очракларда йөрәк ритмы бозылу, нерв системасы зарарлануы (көзән җыеру, аңның буталуы), шулай ук бавыр һәм бөерләрнең токсик зарарлануы ихтимал.

Гөмбә белән агуланганда беренче ярдәм: нишләргә?

Кичекмәстән медицина ярдәме сорап мөрәҗәгать итегез: ашыгыч ярдәм чакыртыгыз яки зыян күрүчене дәваханәгә китерегез.

Табиблар килгәнче ашказанын юдырыгыз: аз-азлап 4-5 стакан су эчегез һәм косыгыз. Процедураны берничә тапкыр кабатлагыз.

Сорбент – активлаштырылган күмер яки башка энтеросорбент (инструкция буенча) кабул итегез.

Агулану вакытыннан бераз вакыт үткән булса, эч йомшарткыч эчегез яки клизма ясагыз.

Дәваханәдә диагнозны ачыклау өчен калган гөмбәне саклагыз.

Шунысы мөһим: гөмбә белән агуланганда үз-үзеңне дәвалау белән шөгыльләнергә ярамый. Бары табиб кына дөрес дәвалауны билгели ала.

Гөмбә белән агуланудан ничек сакланырга: иминлек кагыйдәләре

Гөмбә җыю шатлык кына китерсен өчен, гади, ләкин ышанычлы кагыйдәләрне үтәгез:

100% ышанычлы гөмбәләрне генә җыегыз. Аз гына шик булса да, алмагыз.

Яшь, нык, сәламәт гөмбәләрне генә җыегыз.

Артык үскән, көпшәкләнгән, черек гөмбәләрне алмагыз.

Гөмбәне җыйган көнне үк эшкәртегез.

Гөмбәне юл буенда, паркларда, сәнәгать зоналары һәм пестицидлар белән эшкәртелгән кырлар янында җыймагыз.

Яңа җыйган, киптерелгән, тозланган яки маринадланган гөмбәләрне очраклы кешеләрдән һәм санкцияләнмәгән сәүдә урыннарыннан сатып алмагыз. Аларны экспертиза уза торган рәсми урыннарда гына сатып алырга кирәк.