Чистай поликлиникасында үпкә авыруларын диагностикалау өчен заманча флюорограф эшли башлады

Сәгать заводы поселогында яшәүчеләр Чистай үзәк дәваханәсенең 2нче номерлы шәһәр поликлиникасында заманча флюорография аппаратында күкрәк читлеге органнарына диагностика узарга мөмкинлек алдылар. Җайланма «Сәламәтлек саклау» милли проектының «Сәламәтлек саклауның беренчел звеносын модернизацияләү» программасы кысаларында сатып алынган.

Яңа аппарат күкрәк читлеге органнары авыруларына тиз һәм югары төгәллек белән диагностика ясарга мөмкинлек бирә. Аның ярдәмендә табиблар иртә стадияләрдә үпкә, йөрәк, умырткалыкның күкрәк бүлеге һәм кабыргалар патологиясен ачыклый ала. Җиһазларның үзенчәлеге булып рентген йөкләнешенең кимүе тора, бу процедураны пациентлар өчен дә, медицина персоналы өчен дә куркынычсызрак итә.

Флюорографик тикшеренүне поселокта һәм аның тирәсендә яшәүче барлык теләүчеләр уза ала. Процедура алдан язылмыйча гына Энгельс урамы, 105нче йорт (2нче шәһәр поликлиникасы) адресы буенча үткәрелә.

Кабинетның эш графигы: 8дән 13 сәгать 30 минутка кадәр. Өстәмә мәгълүматны 4-38-63 регистратура телефоны аша алырга мөмкин.

Табиблар флюорографик тикшерүне даими узу авыруларны вакытында ачыкларга һәм аларның үсешен булдырмаска мөмкинлек бирә, дип искәртә. Риск төркемнәренә кергән, шулай ук озак вакыт медицина учреждениеләренә йөрмәгән кешеләргә диагностика узу аеруча мөһим.