«Соль и Лед» төркеме: Казан рок-сәхнәсендә яңа исем

Еш кына зур вакыйгалар кечкенәдән башлана. Казанның яшь һәм перспективалы «Соль и Лед» музыкаль төркеме белән әнә шулай була. Ул Чистайда туып-үскән Алексей Мкртумов һәм Илгиз Гафуров ярдәме белән күптән түгел барлыкка килгән.

Коллективта катнашучыларның барысы да музыка һәм иҗаттан ерак өлкәләрдә эшлиләр, әмма аларны музыкага булган мәхәббәт берләштерә: репетицияләргә һәм чыгышларга вакытны алар эштән бушаган вакытта табалар.

Коллектив ничек барлыкка килгән

– Төркем оештыру идеясе 2020 елда ук барлыкка килде. Күңелсез иде һәм мин Чистайдан таныш музыкант – Алексей Мкртумовның да Казанга күчеп килүен искә төшердем, – дип сөйли Илгиз.  – Аңардан кайда да булса уйнамыймы, дип кызыксындым. Ул уйнамый булып чыкты, ләкин коллективны нульдән төзергә тәкъдим итте.

Алар икәү җырлар яза башлыйлар. Икесе дә – музыка һәм текст авторлары. Ике ел тирәсе бергә эшләгәч, шактый материал тупланган, ләкин шулай килеп чыга, егетләрнең юллары аерыла.

2025 елның икенче яртысында Алексей Мкртумов Илгизгә кабат шалтырата – бу юлы нияте җитди була. Бергәләп музыкантлар эзли башлыйлар.

Бүгенге көндә состав шундыйрак: Илгиз Гафуров – вокалчы, Алексей Мкртумов – соло-гитара һәм бэк-вокал, Алексей Пибуков – бас-гитара, Даниил Кудинов – барабан, Тимур Мизбахов – ритм-гитара.

Алексей Мкртумов – музыка, аранжировка һәм тавыш өчен, Илгиз –текстлар, мотивлар һәм алга китеш өчен җавап бирә. Төп авторлар – алар икәү, әмма коллектив барысын да тыңлый: әгәр кемдер идея тәкъдим итсә, аңа игътибар белән карыйлар.

Ни өчен «Соль и Лед»

– «Соль и Лед» дип аталдык – моңа әллә ни аңлатма юк, матур яңгырый, – ди Илгиз елмаеп. – Без поп-рок, альтернатива, панк-рок һәм мелодик-хардкор жанрларында уйныйбыз. Төгәл бер стильгә генә бәйлелек юк, безнең музыка иң авыр һәм бик үк җиңел дә түгел – күпләргә ошарга тиеш.

Ир-егетләр озак вакыт шәһәрнең төрле урыннарында репетицияләр ясыйлар һәм менә күптән түгел генә үз студияләрен булдырганнар: бер гаражны җиһазландырганнар. Барысы да эшләгәнлектән, уртак вакыт табу җиңел түгел, әмма теләк һәм кызыксыну җиңә.

– Вакыт табу, әлбәттә, авыр, әмма табарга тырышабыз. Барысына да кызык, барысы да уйнарга телиләр һәм шуның белән яналар, шуңа күрә әлегә мондый проблемалар килеп чыкмады. Әгәр килеп репетиция ясарга кирәк икән – җыенабыз да киләбез, – ди безнең әңгәмәдәш.

Тиздән яңа җыр чыгачак

Төркем Казан клубларында еш чыгыш ясый, аның инде үз җанатарлары бар. Сүз уңаеннан, 6 октябрьдә аларның чираттагы яңа җыры чыкты.

– Безнең җырлар күбесенчә үз-үзеңне җиңү, үз-үзеңне тормышка ашыру һәм барысы да яхшы булачагы турында. Бераз моңсу, ләкин бу күңелле сагыш, – дип өсти вокалчы.

«Соль и Лед» төркемен барлык музыкаль мәйданчыкларда тыңларга мөмкин. Коллектив циклны башлаган инде һәм өч атна саен бер җыр чыгарырга тели. Егетләргә уңышлар телик!