Гран-при Казанга китте, ә йөрәкләр Чистайда калды: «Чистай очрашулары» фестивале ничек узды

Узган ялларда «Наречье» яр буенда III төбәкара автор җырлары фестиваленең гала-концерты киң колач белән узды.

Быел оештыручылар беренче мәртәбә гадәти диварлардан чыктылар: бәйрәмнең мәдәни үзәге матур яр буена күчте, анда төп сәхнә җәелдерелде.

Фестиваль кичке тамашага кадәр үк башланып китте: музей-күргәзмә комплексында сайлап алу, эксклюзив мастер-класслар һәм традицион «бергә утырулар» узды. Су буенда барлык катнашучыларны һәм кунакларны җыйган масштаблы музыкаль тамаша фестивальнең кульминациясе булды.

Чара район башлыгы Дмитрий Иванов, «Бетар», «Нептун» компанияләре, «Восток» сәгать заводы, Чистай музей-тыюлыгы һәм «Новое радио» мәгълүмати партнер ярдәмендә узды.

Йолдызлы жюри десанты

Конкурсантларны бәяләргә бөтен илдән автор җырлары осталары килде:

Татьяна Винокурова (Тверь) – Россия Язучылар берлеге әгъзасы, дәрәҗәле Бөтенроссия һәм халыкара конкурслар лауреаты;

Екатерина Романова (Чиләбе) – «Большая перемена» интернет-конкурсы жюри әгъзасы;

Татьяна Вохмина (Ялта) – мультиинструментальче, «Алтын талант» фонды стипендиаты, НТВда «Талантлар иле» программасы кунагы;

Мария Смолова һәм Павел Четвериковның Мәскәү дуэты.

Аларның чыгышлары чистайлылар өчен чын бүләк булды: тамашачылар гитара тавышын гына түгел, ә үтемле автор сүзен дә ишеттеләр.

Рәсми өлеш һәм бүләкләр

Концерт программасын җирле «Июльское утро» бард-бэнды ачты, ә аның җитәкчесе, фестивальнең идея илһамчысы Таһир Мөхәммәтов мәдәният бүлеге җитәкчесе Наталья Япаева кулыннан Рәхмәт хаты алды. Музей-тыюлык директоры Светлана Скучаевадан җылы рәхмәт сүзләре яңгырады, ул жюри әгъзаларына һәм Шарыгиннар гаиләсенә шәһәр музейларына бушлай керү өчен сертификатлар тапшырды.

Лауреатлар арасында аеруча аерылып тордылар:

Роза Гобәйдуллина, жюрины «Счастье взахлеб» исемле үтемле шигыре белән таң калдырды («Шагыйрьләр» номинациясендә җиңү);

Дарья Савченко – «Ночь» шигыре белән тамашачыларның күңелен яулаган иң яшь катнашучы.

Төп җиңүче

Фестивальнең Гран-приен Казанга Сергей Антонов алып китте. Аның конкурс программасына үзенең «Главная» җыры (2015 ел) һәм Иосиф Бродский шигырьләренә импровизация кертелгән, аңа көйне ул гитара кылларын уйнатканда очраклы рәвештә иҗат иткән.

– Мин Таһир Мөхәммәтовка чакыруы һәм шундый ук талантлы фикердәшләр даирәсенә эләгү мөмкинлеге өчен рәхмәтлемен. Жюри профессиональ дә, илтифатлы да булды. Чулман буендагы тыныч, ләкин мәһабәт Чистай шәһәре аеруча тәэсир калдырды. Без тамашачыларны илһамландыра алдык дип ышанам. Ә үземнең җиңүемне мин югарыдан билге итеп кабул итәм, – дип хис-кичерешләре белән уртаклашты Сергей.

Быел Фестиваль уңышлы үтте: ул музыка, шигърият һәм Чулман буенда кабатланмас кояш батулары белән тулы иде. «Чистай очрашулары»ның төп традициясе – гитара кыллары аккордына җыелу – рухилыкның сәхнә масштабына бәйле булмавын кабат исбатлады.

Илья Сологуб фоторепортажы