Чистай районы мәдәният хезмәткәре «Ел хатын-кызы. Ел ир-аты: хатын-кыз карашы» конкурсының зона этабында җиңү яулады

Түбән Кондрата авылыннан Алевтина Нухратова «Ел хатын-кызы. Ел ир-аты: хатын-кыз карашы» республика конкурсының зона этабында «Хатын-кыз – мәдәният һәм рухият» номинациясендә җиңү яулады. Ул Түбән Кондрата авыл Мәдәният йортында филиал мөдире булып эшли. Бу хакта социаль челтәрдәге «Чистай авыл клублары» битендә хәбәр ителә.

Алевтина Алексеевна – чуваш мәдәниятен саклаучы һәм популярлаштыручы. Аның җитәкчелегендә «Илем» чуваш халык җыр һәм бию ансамбле һәм «Илемпи» хореография коллективы иҗат итә. Аның эшчәнлеге ярдәмендә авылда Уяв, Сурхури, Питрау, Кер Сари, Улах, Раштав, Манкун вайсем кебек борынгы чуваш милли йолалары һәм бәйрәмнәре торгызыла һәм үткәрелә.

Алевтина Нухратованың иҗат эшчәнлеге күпкырлы. Ул Петровлар-Нухратовлар гаилә ансамбленең оештыручысы һәм катнашучысы булып тора, борынгы җырларны да, автор җырларын да башкара, шулай ук төрле технологияләр кулланып, милли чигү традицияләрен саклый.

Югары һөнәри осталыгы һәм мәдәниятне үстерүгә керткән өлешләре күп санлы бүләкләр: ТР Мәдәният министрлыгының «Мәдәнияттәге казанышлары өчен» күкрәк билгесе, Татарстан халыклары Ассамблеясыннан, чуваш милли-мәдәни автономиясеннән һәм башка учреждениеләрдән дипломнар һәм Рәхмәт хатлары белән билгеләп үтелә. Шулай ук Алевтина Алексеевна «Татарстан Республикасының иң яхшы мәдәният хезмәткәре» грантына ия.

Аның иҗтимагый эшчәнлеге дә киң: ул районның чуваш милли-мәдәни үзәге советы әгъзасы, Түбән Кондрата җирлегенең башкарма комитетына ике тапкыр депутат итеп сайлана һәм «Чистай – фронтка» волонтерлык хәрәкәтендә актив катнаша.

«Ел хатын-кызы» конкурсында җиңүе – Алевтина Нухратованың халыкның мәдәни кодын саклап калу һәм кече ватанын рухи яктан баету буенча күпьеллык фидакарь хезмәтен лаеклы тану ул.

Социаль челтәрдәге «Чистай авыл клублары» берлеге фотолары