Динара Гарифуллина студент елларын мөмкинлекләр һәм ачышлар вакыты дип саный

Әлеге бәйрәм алдыннан без Казан инновацион университетының көллият филиалының 3нче курс студенты Динара Гарифуллина белән аралаштык. Ул шәхси мисалында замана студентының барысына да өлгерә торган кеше булуын исбатлый.

– Динара, син кайсы факультетта укыйсың һәм ни өчен нәкъ менә шул юнәлешне сайладың?

– Мин «Туризм һәм кунакчыллык» факультетында укыйм. Һөнәр сайлау минем өчен мавыгуларымның табигый дәвамы булды: мин сәяхәт итәргә, яңа урыннар ачарга, мәдәният һәм тарихка чумарга яратам. Алай гына да түгел, мин туган Чистаемны бик яратам һәм аның туристлык урыны буларак үсешенә үз өлешемне кертергә телим.

Студент тормышы – лекцияләр һәм конспектлар гына түгел, ә үзеңне фәндә, иҗатта яки һөнәри конкурсларда күрсәтү мөмкинлеге дә. Уку вакытында һәр студентта горурлык өчен сәбәп булган вакыйгалар багажы җыела.

– Уку дәверендә барыннан да бигрәк нинди вакыйга синең исеңдә калды?

– Минем өчен иң зур сынау, һичшиксез, «Профессионаллар» илебез чемпионатында «Экскурсия хезмәтләрен оештыру» компетенциясендә катнашу булды. Минем юлым февраль аенда Казанда төбәк сайлап алуда җиңүдән башланды. Бу алга таба сайлап алу этабына тырышып әзерләнүгә этәргеч бирде. Бөтен әзерлек минем эксперт-остазым Эльмира Нәваил кызы Җамалетдинова белән тыгыз хезмәттәшлектә узды. Бергә без һәр нәрсәне озак һәм тырышып эшләдек.

Апрель аенда мин Владивостокны яуларга киттем, анда җитди сайлап алу узгач, һөнәри осталык өчен медальон һәм иң мөһиме – финалда чыгыш ясау хокукына ия булдым. Һәм, ниһаять, иң җаваплы һәм җитди чор май аенда Түбән Новгородта узган финал булды. Миңа, башка 10 финалистка кебек үк, чит ил кешеләрен һәм туризм өлкәсендә эшләүче белгечләрне дә кертеп, чикләнгән вакыт эчендә конкурс биремен үтәргә: заказ кабул итәргә һәм документлар тутырырга, проблемалы хәлдән чыгу юлын табарга һәм авторлык мастер-классы үткәрергә туры килде. Финалга юл озак һәм нәтиҗәле булды. Борчылдыммы? Әлбәттә! Борчылу, дулкынлану, җаваплылык – болар барысы да булды. Ләкин нәкъ менә шундый сынаулар холыкны чыныктыра да инде. Бүләкләү тантанасында нәтиҗәләр игълан ителгәч – төп зачетта бронза һәм команда зачетында алтын – мин үзем өчен дә, командабыз һәм көллиятебез, гомумән, Чистаебыз өчен бик сөендем. Шул секундта йокысыз әзерлек төннәре, сәгатьләр буе уку, икеләнү минутлары – барысы да искә төште һәм мин моның юкка булмаганлыгын аңладым.

Шушы көннәрдә Казанда «Профессионаллар» чемпионат хәрәкәте җиңүчеләрен һәм призерларын тантаналы рәвештә котлау булды. Минем өчен Республика Рәисе Рөстәм Нургали улы Миңнеханов белән очрашу зур дәрәҗә булды. Аның җылы котлау сүзләре һәм ихлас теләкләре – алга таба барырга зур этәргеч. Уңышларыбызга карата мондый игътибар күрсәтүе бик кадерле. Рөстәм Нургали улы безне котлап кына калмады, ә абруйлы чемпионатларда җиңүләр республикабызның кадрлар потенциалын үстерүгә зур өлеш кертә, дип ассызыклады.

– Динара, ә шәхсән синең өчен Студентлар көне нәрсәне аңлата?

– Минем өчен Студентлар көне – ул, барыннан да элек, энергия һәм чиксез мөмкинлекләр бәйрәме. Бу көнне син үзеңне шундый ук мавыгучан, белемгә омтылучы, хыялланырга яратучы һәм яңаны сынап карарга курыкмаучы кешеләрнең бер өлеше итеп хис итәсең. Форсаттан файдаланып, үзем белем алган көллияткә рәхмәтемне белдерәсем килә. Нәкъ менә ул безгә белем генә түгел, ә мөмкинлекләр дә бирә.

– Студент тормышын башлап кына килүче егетләргә һәм кызларга син нинди киңәшләр бирер идең?

– Иң төп киңәш – кыю эш ит! Студентлык – ул фәнни конференцияләрдән һәм һөнәри чемпионатлардан алып волонтерлыкка һәм иҗади проектларга кадәр барысын да сынап карарга мөмкин һәм кирәк булган уникаль вакыт. Укыту программасы белән генә чикләнмәгез. Мондый һәр вакыйга – ул бәяләп бетергесез тәҗрибә. Практика эзләгез, үз эшенең осталары белән аралашыгыз, уңышка үз маршрутыгызны беренче курстан ук төзи башлагыз. Һәм, әлбәттә, булачак һөнәрегезне яратыгыз. Эш чын-чынлап мавыктырганда, хәтта авырлыклар да җиңел кичерелә. Үзегезгә ышаныгыз, иптәшләрегезгә ярдәм итегез һәм исегездә тотыгыз: иң зур казанышлар бер кыю омтылыштан башлана. Хәерле сәгатьтә!

Язма авторы: Лиана Беспалова