Чистайда мәктәпкәчә белем бирү учреждениесенең иң яхшы педагогын атадылар

1нче номерлы  балалар бакчасында муниципаль «Ачыш» һөнәри осталык конкурсы булды.

Конкурста  үз һөнәрләре буенча  хезмәт юлын башлаган яшь педагоглар  катнашты. Аларның һәрберсе  жюрига һәм тамашачыларга  балалар белән  эшчәнлекләреннән фрагментлар һәм ике истәлекле датага: Татарстанда Хәрби батырлык һәм хезмәт  фидакарьлеге елына, Россиядә мәктәпкәчә белем бирү  учреждениесе елына багышланган  эссе тәкъдим иттеләр.

Конкурс комиссиясе  педагогның балалар белән уртак телне таба белүенә, дәресләргә  иҗади якын килүенә һәм материаллар  бирүенең үзенчәлегенә  игътибар итте. Катнашучылар  һөнәри белемнәрен күрсәтеп кенә калмадылар, үсеп килүче яшь буын белән чын күңелдән кызыксынуларын да  күрсәттеләр.

Конкурс нәтиҗәләре  буенча  җиңүне 1нче номерлы балалар бакчасы  укытучы-логопеды  Карина Хөснуллина  яулады.  Жюри әгъзалары  аның энтузизмын, стандарт булмаган идеяләрен һәм  барлык катнашучыларны да сокландырган  балаларга ихлас мәхәббәтен  билгеләп үттеләр.

«Ачыш»  конкурсында катнашучыларның барысы да  дипломнар һәм  истәлекле бүләкләр алдылар. Оештыручылар билгеләп үткәнчә,  ярышларның төп нәтиҗәсе булып алга таба һөнәри эшчәнлеккә һәм  яшь педагогларның үзләре сайлаган һөнәрләрендә камилләшергә һәм үсәргә рухландыручы көч  тора.