Әйләнә-тирәдә күселәр һәм тараканнар!

– Минем йортым янында контейнер мәйданчы­гы урнашкан. Чүп савытлары чиста, чүп-чар даи­ми чыгарыла. Әмма контейнерлар янындагы хәл­не сүзләр белән генә сурәтләү мөмкин түгел. Менә инде ярты елдан артыграк анда төрледән-төрле чүп-чар аунап ята. Кешеләр шунда бөтенесен  - агач ботакларын, бакча чүбен, иске җиһазларны алып килеп ташлыйлар. Кайберәүләр чүп савытларына килеп тә җитмичә, чүп-чар салынган пакетларын ярты юлда ташлап калдыралар. Шуның өстенә, якында ук урнашкан металл ватыкларын җыю буенча предприятие дә үз калдыкларын мәйданчыкка чыгарып ташлый. Коточкыч! – дип зарын белдерде Наил Гыйльметдин улы.
Ул әлеге чүп өемнәренә күселәр һәм тараканнар ияләшүен дә хәбәр итте. Ә күптән түгел чүплеккә ут төрткәннәр. Пенсионер икенче юлы ялкынның аның йортына да күчәргә мөмкин булуына борчу белдерде.
– Шулай буламыни соң?! Әлеге мәсьәлә белән кемдер шөгыльләнергә тиештер бит?! Һәм шундый чүп өемнәрен бөтен шәһәр буенча күзәтергә туры килә, – дип өстәде пенсионер.