Хәзер ана капиталы буенча өлешне ипотека түләнеп беткәнче үк бүлеп була

Татарстан Росреестрында хәбәр итүләренчә, ведомствога даими рәвештә гражданнар кредит акчаларын һәм ана капиталын кулланып сатып алынган торак йортта кредит һәм ипотека түләнеп беткәнче өлеш бүлеп бирү үтенече белән мөрәҗәгать итәләр. Шуңа бәйле рәвештә, әлеге мәсьәлә Росреестрга тикшерүгә чыгарылды. Россия Хезмәт министрлыгы, Росреестр, шулай ук Татарстан Республикасы Прокуратурасыннан алынган аңлатмалар нигезендә, кредит һәм ана (гаилә) капиталы акчаларыннан файдаланып сатып алынган торак йортның милек өлешенең күләмен билгеләү турында килешү төзү кредитны һәм ипотека турында теркәү язмасын тулысынча түләп бетергәнче мөмкин, әгәр мондый килешүне төзергә залогка алучы риза булса. Башкача әйткәндә, өлешләрне бүлеп бирү өчен банк ризалыгы кирәк.

Татарстан Росреестры җитәкчесе урынбасары Лилия Борһанова:

«Ана капиталына дәүләт сертификаты бирү балалары булган гаиләләргә лаеклы торак шартларын булдыруга юнәлдерелгән дәүләт ярдәменең өстәмә чарасы булып тора. Ипотека, үз чиратында, кредит килешүе буенча бурыч суммасын залогка алучыга түләүне тәэмин итә. Шул ук вакытта кредит килешүен үтәү срогы шактый озын булырга мөмкин: ипотеканы 10, 15, 20 һәм хәтта 30 елга да алалар. Шулай итеп, ата-аналарның өлешләрне бүлеп бирү буенча бурычларын үтәү балалары балигъ булганнан соң да булырга мөмкин».

Экспертлар фикеренчә, бу яңалык килешүләр төзүне гадиләштерә һәм ана капиталы акчаларын торак шартларын яхшыртуга юнәлтүче күп кенә гаиләләрнең тормышын җиңеләйтә. Эш шунда, ипотеканы түләп бетергәнче балаларга өлеш бүлеп бирү мөмкинлеге булмау күчемсез милек объектын сатканда авырлыклар тудыра. Кагыйдә буларак, заемчыга башта ипотека бурычын түләү өчен акча табарга, аннары бөтен гаиләне өлешләр белән тәэмин итәргә кирәк, шуннан соң гына күчемсез милек объектын сатарга мөмкин булачак.

Ипотеканы түләп бетергәнче өлешләр бүлеп бирү фатирны тизрәк сату мөмкинлеген бирә. Өстәвенә, хәзерге вакытта күп банкларда ипотекада булган фатирны сатып алу программасы бар, анда милек хокукына кергәнче ипотека бурычын алдан түләргә кирәк түгел. Шуңа күрә заем алучыларга сатып алу-сатуны күпкә җиңелрәк һәм юридик яктан ышанычлырак башкарырга мөмкин булачак.

Матбугат хезмәте