Хатын-кызлар мошенник­лар­ның корбаны булганнар

Луч поселогында яшәүче бер ханым банк платформасының берсендә инвестицияләр салырга тырышып, үз акчасын югалткан.

– Интернетта ул өстәмә акча эшләү буенча реклама тапкан, анда күрсәтелгән сайтта заявка, телефон номерын һәм шәхси мәгълүматларын калдырган. Хатын-кызга «финанс консультант» шалтыраткан һәм акча салу шартларын аңлаткан. Нәтиҗәдә, ике атна эчендә 35 яшьлек хатын-кыз табыш алу өмете белән 260 мең сумнан артык акча салган. Аның битен блокка куйганнар. Тикшерүче тарафыннан «Мошенниклык» маддәсе буенча җинаять эше кузгатылды, – дип сөйләделәр Россия Эчке эшләр министрлыгының Чис­тай районы буенча бүлегенең матбугат хезмәтендә.

Чистайда яшәүче тагын бер хатын-кыз мошенникларның кармагына эләккән. Аферистлар 35 яшьлек хатын-кызны банк картасы белән мошенниклык гамәлләрен кисәтүне сылтау итеп алдаганнар.

Эчке эшләр министрлы­гының матбугат хезмәтеннән хәбәр итүләренчә, зыян күрү­чегә үзен банк хезмәткәре дип таныштырган бер кеше шалтыраткан һәм ниндидер ир-атның ышаныч кәгазе нигезендә аның исеменә кре­дит рәсмиләштерүгә гариза биргәнен хәбәр иткән. Хатын-кыз дулкынланган һәм беркемгә дә ышаныч кәгазе бирмәвен әйткән. Шуннан соң «банк хезмәткәре» шәхси кабинетта счетны тикшерергә тәкъдим иткән, ә моның өчен телефонга ерактан керү системасын урнаштыруны сораган. Мошенник бу мөмкинлекне алуга, зыян күрүченең счетыннан 55 мең сум акча алынган.

«Банк картасыннан акча урлау» маддәсе буенча җинаять эше кузгатылган.