Татьяна Малхасян ТҖС эшчәнлеге һәм Елгачылар поселогы перспективалары турында сөйләде

Төзекләндерү: агымдагы бурычлар һәм перспективалар
Сөйләшүнең төп темаларыннан берсе территорияне төзекләндерү булды. Татьяна Малхасян сүзләренә караганда, ташландык дәваханә эшне катлауландыра, чөнки булган мәгълүматларга караганда, ул федераль хакимият карамагында тора.
— Без бу мәсьәләне хәл итү өчен хакимият белән актив хезмәттәшлек итәбез. Шәһәр башкарма комитеты җитәкчесе урынбасары Айрат Хамматов милекчеләр белән сөйләшүләр алып бара. Дәваханә урынында шифаханә-курорт үзәге яки кунакханә комплексы төзергә инвесторларны җәлеп итсәк, яхшы булыр иде. Уңышлы урнашуы: елгага, дамбага һәм шәһәр үзәгенә якын булуы проектны перспективалы итә, — дип билгеп үтте Татьяна Малхасян.
Дәваханәдән кала, суднолар ремонтлау заводы ашханәсе территориясе һәм сүтелергә тиешле иске торак йортлар игътибар таләп итә.
Тагын бер мөһим объект — дамба. Әлегә аны үзгәртеп төзекләндерү проекты эшләнү стадиясендә, әмма хәзердән үк инде ТҖС һәм җирле халык көче белән анда өмәләр үткәрелә. Планда — ял итү зоналарын төзекләндерү, эскәмияләр урнаштыру, шашлык пешерү зоналары һәм су коену өчен куркынычсыз урыннар булдыру. Әмма болар барысы да шулай ук зур акча таләп итә.

Яшелләндерү һәм иҗтимагый киңлекләр
Микрорайонда яшелләндерү эшләре актив алып барыла: чәчәкләр, куаклар һәм агачлар утыртыла. Бер ел элек ачылган Елгачылар скверы биредә яшәүчеләр һәм идарәче компания тырышлыгы белән акрынлап төзекләндерелә.
— Бутлеров урамы буенда (43-а һәм 45-а йортлары янында) чәчәк түтәлләрен Г. И. Усманов исемендәге Чистай авыл хуҗалыгы техникумы студентлары эшләде. Киләчәктә без скверны шәһәр халкы һәм кунаклары өчен тагын да уңайлырак итәргә — киңәйтергә планлаштырабыз, — дип планнары белән уртаклашты Татьяна Малхасян.

Патриотик тәрбия һәм ветераннар белән эшләү
Ватанны саклаучы елы кысаларында 7нче номерлы ТҖС тыл хезмәтчәннәре һәм хезмәт ветераннары, шул исәптән суднолар ремонтлау заводының элеккеге хезмәткәрләре белән актив хезмәттәшлек итә. Әмма Татьяна Вячеславовна билгеләп үткәнчә, шәһәрдә Бөек Ватан сугышында катнашучылар бик аз калган һәм алар белән очрашулар оештыру, олы яшькә җитүләре сәбәпле, катлаулана бара.
Ватанны саклаучы көне уңаеннан 4нче номерлы мәктәптә укучылар арасында Ватанны саклаучыларга багышланган шигырь укучылар конкурсы булып узды. Иң яхшы чыгыш ясаучыларны май аенда Җиңү көненә багышланган митингта чыгыш ясарга чакыру планлаштырыла. Шулай ук мәктәптә «Диңгездә яу» танып-белү-күңел ачу уены узды, аның нәтиҗәләре буенча җиңүчеләр кубок алдылар. Җиңү көне алдыннан «Җиңү өчен рәхмәт» рәсем конкурсы планлаштырылган — иң яхшы эшләр җирле кибеттә куелачак.

Иминлек һәм сәламәт яшәү рәвеше
Балалар белән кисәтү эше ТҖС эшчәнлегенең мөһим юнәлеше булып кала. Юл хәрәкәте кагыйдәләре, финанс куркынычсызлык, мошенниклыктан һәм киберҗинаятьчелектән саклану буенча дәресләр үткәрелә. Җәй көне спорт чараларына аерым игътибар бирелә.

Традицияләр һәм бәйрәмнәр
Елгачылар поселогы үзенең традицияләрен саклый, биредә ел саен Диңгез һәм елга флоты көне билгеләп үтелә, поселок рухына туры килә торган яңа бәйрәмнәр: Балыкчылар көне, Тельняшканың туган көне үткәрелә.
Һәр елны 1 октябрьдә тематик фотозоналар белән «Алтын көз» фестивале уза, узган ел бер зона кулдан эшләнгән челтәрләргә багышланган булган.
Кышын балалар Яңа ел конкурсларында катнашалар, мәсәлән, узган ел алар кар бабайлар ясаганнар һәм «дуслык» җиңгән: барлык 24 катнашучы да бүләкләр алган.
— Без поселоктагы тормышны уңайлырак һәм кызыклырак итәргә тырышабыз һәм бу эшне дәвам итәчәкбез, — дип йомгак ясады Татьяна Малхасян.