Татарстанда медицина уку йортларын тәмамлаучыларга 600дән артык эш урыны тәкъдим иттеләр

Татарстанда эш бирүчеләр Казан дәүләт медицина университетын тәмамлаучылар өчен вакансияләр ярминкәсе кысаларында 600дән артык буш эш урыны тәкъдим иттеләр. Бу хакта «Татар-информ»га югары уку йортының матбугат хезмәтендә хәбәр иттеләр.

Яшь белгечләр белән очрашулар территориаль принципны исәпкә алып үткәрелде, шуның нәтиҗәсендә чыгарылыш студентлары туган районнарында эшкә урнашу тәкъдимнәре белән таныша алдылар.

Казан дәүләт медицина университеты ректоры вазифаларын башкаручы Айрат Фәррахов билгеләп үткәнчә, быел университетны специалитет программалары буенча 582 укучы һәм тагын 44 бакалавр тәмамлаячак. Ул шулай ук ассызыклаганча, ординаторларның 90%тан артыгы белгечлек буенча эш таба, бу төбәктә яшь табибларга ихтыяҗ зур булуын күрсәтә.

Вакансияләр турындагы мәгълүматтан тыш, яшь белгечләргә гамәлдәге социаль ярдәм чаралары турында да сөйләделәр. Татарстан Сәламәтлек саклау министрлыгының Кадрлар үзәге җитәкчесе Вера Семенова хәбәр иткәнчә, республика яшь белгечләрне районнарга эшкә җәлеп итәргә тели. Ул билгеләп үткәнчә, төбәктә федераль программалар, шулай ук Татарстан Хөкүмәтенең 800 мең сум күләмендә республика гранты гамәлдә. Моннан тыш, яшь белгечләргә айлык түләүләр, социаль ипотека буенча квоталар һәм төрле муниципаль ярдәм чаралары каралган.

Чыганак: Вести Татарстан