Татарстанда көннәр суытачак, яшенле яңгыр һәм боз явуы ихтимал

Республикада һава шартлары иртәгә, 26 майда, ук үзгәрәчәк. Төбәк өстендәге күк аязучан болытлы булачак. Төнлә урыны-урыны белән кыска вакытлы яңгырлар булырга мөмкин, әмма иртән, көндез һәм кичен актив атмосфера фронтлары хәрәкәт иткәндә бөтен Татарстан буенча көчле яңгырлар көтелә. Кайбер урыннарда яшен һәм җилнең секундына 16-21 метрга кадәр көчәюе фаразлана, локаль рәвештә боз явуы ихтимал.

Төнлә республика буенча температура +10нан +15 градуска кадәр булачак. Көндез һава +17, +22 градуска кадәр җылыначак, гәрчә ТРның көньягында һәм көнчыгышында термометр баганалары әле 28 градуска кадәр күтәреләчәк.

Чәршәмбе, 27 майда, Татарстан территориясендә болытлы һава торышы өстенлек итәчәк. Вакыт-вакыт яңгырлар көтелә. Урыны белән секундына 15-20 метрга кадәр җил белән яшен фаразлана, шулай ук боз яву ихтималы да сакланачак. Тәүлекнең караңгы вакытында тагын да салкынрак: +9дан +14 градуска кадәр булачак.

Пәнҗешәмбе көнне, 28 майда, республикада янә яшенле яңгырлар көтелә, нигездә, көндез. Көндез шулай ук секундына 15-20 метрга кадәр җиткән көчле җил булачак. Төнлә температура + 5, +10 градуска кадәр төшәчәк. Кояш чыккач, һава +15, +20 градуска кадәр җылыначак.

Метеорологларның беренчел мәгълүматларына караганда, җомга һәм шимбә, 29 һәм 30 майда, төбәк элеккечә циклон йогынтысы астында булачак. Димәк, салкын, тотрыксыз һава торышы сакланачак, вакыт-вакыт яңгырлар явачак. Төнлә термометр баганалары +4, +9 градуска кадәр төшәчәк, ә көндез +15, +20 градуска кадәр күтәреләчәк.

Чыганак: «Татар-информ»