Татарстанда эре габаритлы чүп чыгару кагыйдәләрен үзгәрттеләр

Татарстан Премьер-министры Алексей Песошин республикада каты коммуналь калдыклар белән эш итү тәртибен үзгәртә торган карарны имзалады, дип яза «Татар-информ» мәгълүмат агентлыгы.

Төп яңалык эре габаритлы чүп-чарга кагыла. Әгәр элек иске җиһазларны, техниканы һәм башка зур әйберләрне контейнер мәйданчыкларындагы махсус бункерларда калдырырга мөмкин булса, хәзер аларны чыгару төбәк операторы белән килешү белән көйләнә. Алай гына да түгел, килешүдә башкача каралмаган очракта, халык мондый калдыкларны үзе кирәкле урынга илтеп җиткерергә тиеш.

Документ шулай ук гадәти контейнерларга ташларга мөмкин булган әйберләргә таләпләрне катгыйландыра. Хәзер потенциаль куркыныч калдыкларны тыю төзелеш чүп-чарына да кагыла, агымдагы ремонттан соң калган калдыклар искәрмә булып тора.

Хакимият чүп мәйданчыкларында агач һәм куак ботакларын ташлауны шулай ук тыйды.