Татарстанда бер атна эчендә янгыннарда 8 кеше һәлак булган

Узган атнада Татарстанда янгыннарда 8 кеше һәлак булган. Бу хакта Россия гадәттән тыш хәлләр министрлыгының Татарстан Республикасы буенча Баш идарәсе матбугат хезмәте хәбәр итә.

Ведомство мәгълүматлары буенча, янгыннар нәтиҗәсендә тагын 7 кеше зыян күргән. Шул ук вакытта янгын сүндерү бүлекчәләре 4 кешене коткарган.

Гадәттән тыш хәлләр министрлыгында республика халкын фаҗигаләрдән саклану өчен көнкүрештә янгын куркынычсызлыгы кагыйдәләрен үтәргә чакыралар.

Коткаручылар:

• кабызылган газ приборларын күзәтүсез калдырмаска;

• алар янына тиз янып китүчән әйберләр куймаска;

• газ җиһазларының төзеклеген күзәтергә киңәш итәләр.

Бу гади кагыйдәләрне үтәү янгын чыгуны булдырмаска, гомерне һәм сәламәтлекне саклап калырга ярдәм итәчәк.

Чыганак: «Татар-информ»