Татарстанда бер атна эчендә бензинның ике маркасы һәм дизель ягулыгы кыйммәтләнде

Татарстанда 21 апрельдән 27сенә кадәрге чорда бензинның ике маркасы, шулай ук дизель ягулыгы кыйммәтләнде. Барыннан да бигрәк соңгысына бәя 24 тиенгә, 72,93 сумнан 73,18 сумга кадәр күтәрелгән. Бу хакта Росстат мәгълүматлары дәлилли.

92нче бензин – 8 тиенгә, 62,46 сумга кадәр кыйммәтләнгән. 95нчесенең бәясе 14 тиенгә арткан һәм 66,36 сум тәшкил иткән. Шул ук вакытта 98нченең бәясе үзгәрешсез калган – 89,86 сум.

Исегезгә төшерәбез, бензин республикада 2026 елның гыйнварында шактый кыйммәтләнде. Декабрь белән чагыштырганда, премиаль маркалар аеруча сизелерлек – 2 сумга диярлек арткан. Тулаем Россия буенча автомобиль ягулыгы бәясе бер ай эчендә 1,4%ка, ә еллык чагылышта – 11,6%ка арткан.

Чыганак: Бизнес онлайн