Татарстан Росреестры күчемсез милек белән килешүләрнең законлылыгын тикшерү механизмын аңлатты

Мөрәҗәгать итүче гаризаны һәм теркәлү өчен документларны шәхсән күпфункцияле үзәккә яисә электрон рәвештә тапшырганда, аларда күрсәтелгән белешмәләрнең дөрес булуын һәм ялган документлар тапшырган өчен җаваплылыкка тарту турында аңа билгеле булуын раслый.

Мөһим! 218нче номерлы Федераль закон дәүләт хокук теркәүчесенең килешү яклары белән шәхси аралашуын күздә тотмый, чөнки теркәлүгә документлар я күпфункцияле үзәктән, яисә электрон рәвештә килә.

Документларның хокукый экспертизасы, шул исәптән килешүнең законлылыгын тикшерү кысаларында, дәүләт теркәүчесе аны туктатып тору өчен нигез бармы-юкмы икәнен ачыклый. Законлылыгын нотариус тикшерә торган нотариаль таныкланган сату-алу килешүләре искәрмә булып тора.

Мөһим! Күчемсез милекне сатып алганда шуны аңларга кирәк, дәүләт теркәүчесе сату-алу килешүен төзегәндә дә, теркәүгә мондый килешүне биргәндә дә катнашмый. Аның бурычы – инде төзелгән сату-алу шартнамәсенең гамәлдәге законнар таләпләренә туры килү-килмәвенә хокукый экспертиза уздыру.

Килешү якларының психик сәламәтлеген тикшерүгә килгәндә, Росреестр аны башкарырга вәкаләтле түгел. Шул ук вакытта суд психик тайпылыш аркасында үз гамәлләренең мәгънәсен аңлый алмаган кешене хокукый сәләтсез дип танырга мөмкин. Бу очракта аның өстеннән опека билгеләнә, ә аның исеменнән килешүләрне опекун башкара.

Гражданны хокукка сәләтсез яисә хокукка сәләте чикләнгән дип тану бары тик суд тәртибендә генә гамәлгә ашырыла. Суд карары законлы көченә кергәннән соң, суд Росреестрга тиешле карарның күчермәсен җибәрә. Алга таба кешенең эшкә сәләтсез яки эшкә сәләте чикләнгән дип танылуы турындагы мәгълүмат Бердәм дәүләт күчемсез милек исемлегенә кертелә. Хокукларны теркәү барышында дәүләт теркәүчесе Бердәм дәүләт күчемсез милек исемлегендә тиешле мәгълүматның булуын тикшерә һәм алынган мәгълүматлар нигезендә һәр конкрет килешү буенча карар кабул итә.

Мөһим! Дәүләт теркәүчесе криминалистик (мәсәлән, язу рәвеше) экспертиза уздырырга, теркәүгә тәкъдим ителгән документларның һәм килешү якларының имзаларының дөреслеген ачыкларга вәкаләтле түгел. Шулай ук ул аларның мотивларын, ышанучанлык дәрәҗәсен бәяләргә һәм хокук саклау яки суд органнары вәкаләтләрен башкарырга хокуклы түгел.

Ялган документлар аркасында теркәлүне туктатып тору

Әгәр тапшырылган документлар ялган булып чыкса яисә аларда күрсәтелгән белешмәләр дөрес булмаса, дәүләт теркәүчесе хокукларны теркәүне туктатып тору турында карар кабул итәргә хокуклы. Моның өчен ул тиешле документны чыгарган хакимият органнарыннан һәм оешмалардан өстәмә мәгълүмат соратып ала.

Мөһим! Әгәр тапшырылган документның ялган булуы расланса, бу хакта мәгълүмат хокук саклау органнарына җибәрелә.

Матбугат хезмәте