Татарстан методистлары һөнәри уңышлары өчен түләү алырга мөмкиннәр

Татарстан Министрлар Кабинеты муниципаль мәгариф идарәсе органнары белгечләренә «Безнең иң яхшы методист» акчалата бүләкләү тәртибен раслады. Тиешле карар республиканың хокукый мәгълүматның рәсми порталында басылып чыкты.

Ярдәмнең яңа чарасы методистларга, өлкән методистларга һәм республиканың муниципаль берәмлекләре мәгариф идарәләренең (бүлекләренең) мәгълүмати-методик бүлекләре җитәкчеләренә кагыла. Конкурс нигезендә сайлап алуны оештыруны республиканың Мәгариф һәм фән министрлыгына тәэмин итү йөкләнде.

Белгечлеге буенча кимендә өч ел яисә кимендә 10 ел педагогик стажы булган, шулай ук методик эш системасын үстерүгә юнәлдерелгән индивидуаль методик проектларны гамәлгә ашыручы белгечләр бүләкләнүчеләр була алачак.

Ел саен акчалата бүләкләүне конкурс нигезендә сайлап алуда җиңгән 305 кешегә тапшыру планлаштырыла. Түләү күләме һәр алучыга 172 414 сум тәшкил итәчәк.

Конкурста катнашу өчен белгечләр гариза, индивидуаль проект, һөнәри казанышлар турында белешмәләр һәм башка документлар тапшырырга тиеш булачак. Катнашучыларга комиссия бәя бирәчәк, аның составына хакимият органнары вәкилләре, гомуми белем бирү өлкәсе белгечләре, галимнәр һәм җәмәгатьчелек вәкилләре керәчәк.

Документларны бәяләү һәм шәхси проектны тәкъдир итү йомгаклары буенча иң күп балл җыйган катнашучылар җиңүчеләр булачак. Түләүләр бирү турындагы карарны Татарстан Мәгариф һәм фән министрлыгы конкурс комиссиясе беркетмәсе нигезендә кабул итәчәк.

Чыганак: Татар-информ