Татарстан Эчке эшләр министрлыгы телефон мошенниклары еш куллана торган сүзләрне атады

Татарстан Республикасы буенча Эчке эшләр министрлыгының мәгълүмати-коммуникацион технологияләрне законсыз куллануга каршы көрәш оештыру бүлегенең аеруча мөһим эшләр буенча оперуполномоченные Рәдис Йосыпов җинаятьчеләр потенциаль корбаннар белән аралашканда куллана торган типик сөйләм әйләнешләрен халыкка җиткерде. Алар төбәктә мошенниклыкның иң резонанслы очракларын анализлау нигезендә төзелгән.

Ведомство вәкиле сүзләренә караганда, җинаятьчеләр әңгәмәдәшне бутау һәм әңгәмәгә ялган рәсмилек бирү өчен юридик һәм финанс терминнарын махсус рәвештә сөйләмгә кертә. Трубкада яңгыраган иң еш фразалар арасында – «сезнең исемгә Украина гражданына ышаныч кәгазе рәсмиләштерелгән», «сезнең хисаптан террорчыларга акча күчерелгән»... Моннан тыш, сөйләшү вакытында «куркынычсыз исәп-хисап счеты», «акчаны декларацияләү», «кредит» яки «телефон аша дистанцион тентү» кебек төшенчәләр дә яңгырарга мөмкин.

«Бу терминнарның барысы да мошенниклар тарафыннан уйлап чыгарылган. Полиция хезмәткәрләре һәм башка дәүләт органнары вәкилләре мондый сүзләр кулланмый. Беркем дә видеоэлемтә аша тентү үткәрми, – дип белдерде Рәдис Йосыпов. – Җинаятьчеләр ышандырырлык булсын өчен сезгә ялган документлар күрсәтәчәкләр, гәрчә чынлыкта аларның моны эшләргә хокукы булмаса да. Моннан тыш, көч ведомстволары хезмәткәрләренә гражданнар белән мессенджерлар аша аралашу тыела».

Татарстан Эчке эшләр министрлыгы гражданнарны мондый шалтыратулар кергәндә кичекмәстән сөйләшүне туктатырга һәм алынган мәгълүматны ведомстволарның рәсми элемтә каналлары аша мөстәкыйль тикшерергә чакырды.

Чыганак: «Татар-информ»