Ташу-2026: кар эрүгә ничек әзерләнергә һәм су басулардан ничек сакланырга

Быелгы яз актив булырга охшап тора – кар күп яуды һәм ул эри башлау белән кайбер территорияләргә, аеруча түбәнлектә урнашкан шәхси йортларга су басу куркынычы яный. Су басулардан һәм күңелсез хәлләрдән  саклану өчен   ТР Роспотребнадзор идарәсенең  Чистай бүлеге белгечләре халыкка  гади, әмма әһәмиятле  куркынычсызлык чаралары турында  искә төшерәләр.

Йортыңны һәм гаиләңне су басулардан саклау өчен нәрсә эшләргә

Шәхси йортларда, шулай ук дача участокларында  яшәүчеләргә суның күтәрелүенә алдан ук әзерләнергә тәкъдим итәләр:

Һава торышы һәм якын-тирәдәге сулыкларда су биеклеген күзәтеп торыгыз – бу хәлнең начараюын вакытында сизеп алырга мөмкинлек бирә.

Сезнең райондагы  су басу мөмкинлегенең  чикләрен ачыклагыз. Әлеге мәгълүматны  җирле хакимияттә алырга мөмкин.

Йортларны кардан һәм чүп-чардан арындырыгыз –  бу җыелган суларга тизрәк бетәргә, йортта озак тоткарланмаска ярдәм итә.

Әгәр йортны су басу куркынычы туса, алдан ук кирәкле документларны, җылы киемнәрне, даруларны, фонарик, су һәм ризык запасы әзерләп куегыз.

Подваллардан һәм базлардан  әйберләрегезне һәм азык-төлекне  югары катларга яисә чарлакка менгезеп куегыз.

Кайнар сыекчаларны (бензин, керосин) түгелмәслек итеп ышанычлы урынга куегыз.

Якыннарыгызны – өлкән кешеләрне, авыруларны  һәм балаларны ташулар вакытында куркынычсыз урыннарга урнаштырыгыз.

Алдан ук су суырту чаралары  – насослар, чиләкләр, көрәкләр әзерләгез! Көнкүрештә кулланылучы электр насосы сатып алу мөмкинлеге дә бар.

Балаларга – аерым игътибар!

Бозлар китү һәм ташу вакытында елгалар һәм күлләр  аерым куркыныч зонага әверелә. Балаларны сулыклар янына олылардан башка җибәрмәгез. Аларга боз өстенә язын ни өчен керергә, суда ни өчен уйнарга  һәм боз кисәкләрендә шуарга ни өчен ярамаганны   аңлатыгыз. Салкын су һәм көчле агым  санаулы минутларда фаҗигагә китерергә мөмкин.

Иң мөһиме – кисәтү

Әлеге гади тәкъдимнәрне искә алу  сезнең сәламәтлегегезне һәм якыннарыгызның  тормышын сакларга ярдәм итәчәк. Язгы ташулар вакытында  игътибарлы һәм сак булыгыз!