Танышу сайтында аралашканнан соң акча югалткан

Татар Сарсазы авылында яшәүче танышу сайты аша алдау корбанына әверелгән. Бу хакта Россия Эчке эшләр министрлыгының Чистай районы буенча бүлеге матбугат хезмәте хәбәр итә.
33 яшьлек ир-ат танышу сайтында теркәлгән һәм үзен Ирина дип таныштырган хатын-кыз белән аралаша башлаган. Хатын-кыз исә үзенә 30 яшьтән бераз артыграк булуын әйткән.
Шуннан соң ир-атка билгесез заттан янаулар белән шалтыратулар килә башлаган.
Билгесез зат белдергәнчә, зыян күрүче балигъ булмаган кыз белән аралашкан һәм «закон белән проблемалардан котылу өчен» акчалата компенсация таләп иткән. Ир-ат, куркып, 2950 сум күчергән, ләкин янаулар дәвам иткән һәм ул полициягә мөрәҗәгать иткән.
Әлеге очрак буенча «Мошенниклык» маддәсе белән җинаять эше кузгатылган.

Танышу сайтларында мошенниклардан ничек сакланырга?
1. Мәгълүматны тикшерегез — яңа танышларыгызга шунда ук ышанмагыз.
2. Акча күчермәгез — җинаятьчеләр еш кына шантаж куллана.
3. Беренче янаулардан соң ук полициягә хәбәр итегез.