«Совет стажы өчен өстәмә түләү турындагы мәгълүмат ялган»

Пенсиягә соңрак чыгу отышлы, диләр. Бу шулаймы? Совет стажы өчен өстәмә түләү каралганмы? Пенсия алу хокукы кайчан барлыкка килә? Бу һәм башка сорауларга туры эфир барышында Чистай районында Пенсия фонды һәм социаль иминият бүлегенең клиентлар хезмәте (бүлек хокукында) җитәкчесе Надежда Сергеева җавап бирде.

Аның чыгышы социаль фонд турында кыскача доклад белән башланды. Фонд эшендә күп кенә бурычлар билгеләнгән һәм хәзер алар аеруча мөһим. Пенсия фондының социаль иминият фонды белән берләшүе күп еллар дәвамында социаль өлкәдә барган процессларның логик һәм табигый дәвамы булып тора. Аларның төп максаты, әлбәттә, гражданнар өчен хезмәтләрнең сыйфатын күтәрү.

2023 елның 1 гыйнварыннан социаль фонд балалар пособиеләрен бердәм түләүгә күчте. Бу түләү гаиләләргә ярдәм итүнең җиде чарасын берләштерә. Моңа кадәр пенсия фонды һәм социаль яклау идарәсе тарафыннан башкарылган барлык түләүләр хәзерге вакытта Россия социаль фондында түләнә. Бу түләү гаиләләргә бала туганнан алып 17 яше тулганчыга кадәр бюджеттан бердәм шартларда ярдәм алырга мөмкинлек бирә.

Бүгенге көндә гражданнарга проактив режимда күрсәтелә торган берничә хезмәт бар. Ягъни кеше шәхси кабинетында күрсәтелгән хезмәт турында оешмага мөрәҗәгать итмичә хәбәр ала.

– Хезмәт ана капиталы рәсми­ләштерелгәннән соң өч ел элек активлашты. Ягъни әниләр беренче баласы туганнан соң Россия Социаль фонды сайтында үзләренең шәхси кабинетында түләүнең булуы һәм күләме турында мәгълүмат күрә ала, – дип аңлата Надежда Александровна.

Яңа туган балага СНИЛС та гаризасыз рәсмиләштерелә. 2022 елның гыйнварыннан инвалидлык беренче тапкыр билгеләнгән гражданнарга пенсия автомат рәвештә билгеләнә. Шулай ук инвалидлыгы булган гражданнарга ай саен акчалата түләү гариза язмыйча билгеләнә.

2023 елдан гражданнарга булачак пенсия күләме турында мәгълүмат кертелә. Бу кеше алдан ук түләнгән иминият кертемнәре суммасына һәм шәхси пенсия коэффициенты күләменә йогынты ясый алсын өчен эшләнә, чөнки пенсия күләме шуңа турыдан-туры бәйле.

– Пенсиягә соңрак чыгу отышлы, диләр. Бу шулаймы? – дип сорый эфирны караучы.

– Һәр булачак пенсионерның премия коэффициентлары хисабына яшь буенча иминият пенсиясен өстәмә рәвештә арттыру мөмкинлеге бар. Әгәр аны рәсмиләштерү өчен тиешле хокук барлыкка килгәннән соңрак мөрәҗәгать итсәгез, тупланган пенсия коэффициентлары саны махсус коэффициентка арттырылачак, – дип җавап бирде Надежда Сергеева.

– Пенсия алу хокукы кайчан барлыкка килә?

– Иминият пенсиясе өч төрле: яшь тулу, инвалидлык һәм туендыручыны югалту очрагы буенча була. Яшь тулу буенча иминият пенсиясен билгеле бер яшькә җиткәннәр ала. Инвалидлык буенча иминият пенсиясен сәламәтлек белән бәйле җитди проблемалар аркасында инвалидлар ала, шул ук вакытта алар билгеле бер хезмәт стажы да эшләгәннәр. Ә туендыручыны югалту буенча иминият пенсиясе формалашкан вафат кешенең эшкә сәләтсез гаилә әгъзаларына билгеләнә.

– Пенсия яшенә җиткәч, стаж һәм баллар җыелмаса, нәрсә була?

– Барлык гражданнар да иминият пенсиясенә хокук ала алмый. Бу төрле сәбәпләр аркасында килеп чыгарга мөмкин. Мәсәлән, әгәр кеше тормыш шартлары аркасында эшли алмаса, иминият пенсиясен алу өчен кирәкле иминият стажын һәм пенсия коэффициентларын туп­ламаса. Мондый гражданнар социаль пенсиягә хокуклы булачак. Социаль пенсия 65 яшькә җиткәч хатын-кызларга һәм 70 яшькә җиткәч ир-атларга билгеләнә. Шул ук вакытта социаль пенсия алу өчен иминият стажына яки пенсия коэффициентларына карата бернинди таләпләр дә юк.

Чистайлылар совет стажы өчен өстәмә түләүгә кагылышлы сорау бирү мөмкинлеген кулдан ычкындырмадылар.

– Ул пенсия билгеләгәндә исәпкә алына. Өстәмә рәвештә ул каралмый. Шуңа күрә совет стажы өчен өстәмә түләү турындагы мәгълүматны ялган дип атарга була, – диде Надежда Сергеева.

Шуның белән туры эфир тәмам­ланды. Надежда Александровна онлайн-тамашачыларга сораулары өчен рәхмәт белдерде.

Сүз уңаеннан

Иминият пенсиясе хезмәт эшчәнлеге дәвамында эшләп алынган

пенсия коэффициентлары күләмен (стажның иминиятләштерелмәгән чорлары өчен коэффициентларны да кертеп) пенсия билгеләнгән көнгә бер коэффициентның бәясенә тапкырлау рәвешендә – ул 123 сум 77 тиен тәшкил итә – билгеләнә. Иминият пенсиясенә 7 567 сум 33 тиен күләмендә түләү билгеләнә.

Белү мөһим

Иминият пенсиясен алу өчен түбәндәге шартлар: пенсия яшенә җитү, минималь иминият стажы һәм пенсия коэффициентларының минималь саны булу кирәк.