Сәхнәдә – шигырь укучы яшьләр

Шигырьләр 5нче мәктәп сәхнәсеннән яңгырады, аның базасында «Тормышны, халкыңны һәм аның дөньясын ярат» дигән шигъри бәйге узды. Тукай, шулай ук башка шагыйрьләрнең әсәрләрен шәһәр һәм район мәктәпләреннән 35 укучы укыды.

– Бәйге үсеп килүче буынны татар шигърияте дөньясына, милли мәдәният кыйммәтләренә тарту, мәктәп укучыларының шәхси, әхлакый, эстетик сыйфатларын үстерү өчен үткәрелә. Шулай ук мондый чаралар балаларны иҗади процесска тартырга, аларда ватанпәрвәрлек, милли үзаң тәрбияләргә, туган якка мәхәббәт хисен формалаштырырга ярдәм итә, – дип билгеләп үтте мәгариф идарәсе методисты Айгөл Гайфетдинова.

Жюри әгъзалары нәфис сүз осталарының тышкы кыяфәтен, йөз һәм гәүдә хәрәкәтен, шулай ук тавыш бирү көчен, сөйләмен, интонацияне, аралашу культурасын бәяләделәр. Катнашучыларның тамашачылар белән аралашуына да игътибар иттеләр.

Конкурсантларга чыгышлары вакытында залда утыручы педагоглары көч биреп тордылар. Бу көнне укучылар татар һәм рус телләрендә шигъри әсәрләр укыдылар.

– Бәйгедә катнашу өчен мин Габдулла Тукайның «Милли моңнар» шигырен сайладым, аны татар телендә укыдым. Миңа бу телнең яңгыравы ошый, шуңа күрә аны теләп өйрәнәм. Татар телендә нинди дә булса шигырь укырга керешкәнче, без укытучы белән аны тулысынча тикшерәбез, һәр сүзне тәрҗемә итәбез, аның мәгънәсенә төшенәбез. Шуңа күрә укырга да җиңел, әсәрдәге хис-тойгыларны, кәефне дә яхшырак җиткерергә мөмкин, – дип сөйли Йолдыз мәктәбе укучысы Анастасия Емельянова.

Шигъри конкурста тугызынчы сыйныф укучысы III дәрәҗә призер булды. Ә муниципаль этапта 4 укучы җиңү яулады. Алар Чистай районын республика этабында тәкъдим итәчәк.

Җиңүчеләрне котлыйбыз

– Алмаз Шәрәфетдинов, 2нче гимназиянең 9нчы сыйныф укучысы

– Камилә Сафиуллина, Чистай Выселкасы мәктәбенең 1нче сыйныф укучысы

– Никита Степанов, 2нче лицейның 6нчы сыйныф укучысы

– Рәсүл Фәйзрахманов, 5нче мәктәпнең 8нче сыйныф укучысы